Кентау қаласы үшін тазалық сақтау басты мәселелердің бірі болып саналады. Қоршаған ортаның тазалығын қатаң бақылауда ұстау, қоқыс қалдықтарын бей-берекет тастамау, қалаға жанашырлықпен қарау – әрбір тұрғынның, азаматтың басты міндеті екендігі анық.Өмір сүріп отырған ортаның тазалығына, өскелең ұрпақтың болашағына жанашырлықпен қарайтын әрбір азамат мұны әрдайым естен шығармауы керек.
Кентау қаласында қоқыс жәшіктері жаңартылады. Бүгінгі күні қаладағы халық көп шоғырланатын басты көшелер мен аллеяларға, саябақтар алаңдарына қою жұмыстары басталды.
Тұрмыстық қатты қалдықтарға арналған жәшіктер заманауи үлгіге сай ыңғайлы жасалынған. Жаңа қоқыс жәшігі үш бөліктен құралған. Яғни шыны ыдыстары, пластикалық қалдықтар, тұрмыстық заттардың қалдықтары бөлек салынады.
– Әрбір адам өз айналасы мен жүрген жерін таза ұстап, қоқыстарды арнайы орындарға тастауды әдетке айналдырса, тазалық ең жақын ісіне айналары сөзсіз. Күнделікті тынымсыз қоқыстарды жинайтын жұмысшылардың еңбегіне құрметпен қарап, бағалау арқылы өскелең жастарға да үлгілі іс болары хаһ. Кентау – әрдайым көк желекті, таза ауасы мен таза қала бейнесімен ерекше. Сол келбетті сақтау тұрғындардың қолдауын қажет етеді. Қала – баршаға ортақ! Жалпы, қала тұрғындарын тазалықты сақтауға, эко акцияға белсенділікпен қатысуға шақырамыз! – дейді қала әкімінің баспасөз хатшысы Жанна Әлімбай.
Әрбір қоқыс жәшігіндегі қалдықтарды күн сайын тазалық мекемесі тазалап отырады. Үш бөліктен тұратын қоқыс жәшігінен қалада 200-ін орналастыру, ал қарапайым кіші қоқыс жәшіктен 100-ін қою жоспарланған.
Айта кетейік, қалада қоқыс жәшіктерін орнату және жаңарту мәселесі тұрғындар тарапынан көтеріліп келген. Қала әкімі Рашид Аюпов тұрғындармен кездесуінде бұл мәселені шешу жағы қарастырылып, тиісті шаралар жүзеге асырылатынын атап өткен болатын.
Осы орайда, Кентау қаласындағы Сейфуллин 110а көпқабатты тұрғын үйдің тұрғындары өз жерлестерін тазалық сақтауға үндейді. Бұл үйдің адамдары үнемі өздері тұратын аймақ пен жертөлелеріне тазалық жұмысын жүргізіп отырады. Нәтижесінде, тұрғын үйде түрлі жәндіктер атымен болған емес. Өкінішке орай, кейбір тұрғын үй тұрғындары өздері тұратын аймақтарына салғырт қарағанның салдарынан, адамға зиянды жәндіктерден зардап шегеді. Жағымсыз иіс орын алып, жайсыздыққа әкеп соғады.
Бірлігі бекем, ұйымшыл Сейфуллин 110а тұрғындары барша қала жұртшылығын тазалық сақтауға шақырады. Тазалық – денсаулық кепілі екенін алға тартқан тұрғындар, әр аптаның бір күнін тұратын мекенді қоқыстардан тазартуға арнауды үндейді.
Еске сала кетсек, әр сенбі сайын қала әкімдігінің ұйымдастыруымен эко-акциясы өткізіліп келеді. Қалған күндері қаладағы басты көшелердің қоқыстарын тазартумен тиісті мекемелер айналысуда. “Жасыл қала” КММ қалада абаттандыру жұмыстарын атқаруда. Қала тазалығын сақтау – әрбір тұрғынның қолдауын қажет етеді. Тазалық шараларына барша тұрғындарды белсенділікпен атсалысуға шақырамыз!
