Төлеби аудандық Мәдениет үйінде ауданның 90 жылдық мерейтойына орай, қазақ ұлттық гобелен өнерінің негізін қалаушы, Мемлекеттік сыйлықтың иегері Құрасбек Тыныбековтің туғанына 75 жылдығы құрметіне «Құрасбектің рухы сөйлейді» атты кітаптың тұсау кесер рәсімі мен ақын, журналист Темірғали Көпбаеавтың «Жырым бірге еліммен» атты әдеби шығармашылық кеші өтті.
Мәдени және рухани іс-шара белгілі суретші, қазақ тоқыма өнерін кәсіби тұрғыда қайта түлетуші, біртума талант Құрасбек Тыныбековтің өміржолына арналған деректі фильммен басталды. Оңтүстіктің ғана емес, күллі қазақ елінің мақтанышына айналған белгілі суретші Құрасбек Тыныбеков – қазақ гобелен өнерінің шолпан жұлдызы. Ол – небәрі 33 жыл өмір сүрсе де, өзінен кейін мол мұра қалдырып үлгерген алып өнер иесі.
Әдеби кеште «Құрасбектің рухы сөйлейді» атты суретшінің рухын асқақтатқан үлкен еңбектің авторы – танымал журналист Есенәлі Ералы арнайы келіп, кітаптың мазмұны жөнінде әңгімеледі. Жазушы қазақ бейнелеу өнерінде құйрықты жұлдыздай жарқ етіп, мәңгі туындыларды қалдырған Құрасбек Тыныбековтың рухымен сөйлесе отырып, оның шығармашылығының мән-мағынасын жеткізуі көздегенін, ол үшін ұзақ жылдар бойы зерделегенін жеткізді. «Сәндік өнер саласындағы еселі еңбегінің нәтижесінде Құрасбек Тыныбеков – Қазақ ССР Мемлекеттік сыйлығының иегері атанған. Оның гобелен жанрында ойлап тапқан жаңа техникасын әлемнің көптеген елдерінде шеберлер өз шығармашылықтарында қолданады. Ұлтына, еліне деген сүйіспеншілігін өнерімен паш еткен қылқалам шеберінің есімі еліміздің ұлттық қолданбалы өнері тарихында әрқашан көшбастаушы ретінде жарқырай береді», деді өз сөзінде Есенәлі Ералы.
Шығармашылық басқосуға аудандық мәслихат хатшысы Нұрлан Қойбағаров, аудан әкімінің орынбасары Лесбек Серікбаев қатысып, Қазақстан Жазушылар одағының мүшесі, филология ғылымдарының кандидаты Темірғали Мұратбекұлын 60 жасқа толған мерейтойымен құттықтап, ізгі тілектерін жеткізді. Нұрлан Хамзаұлы өмірін өлеңмен өріп, поэзия әлемінде жыр бесігін тербеткен ақынға Мәслихат хатшысының Грамотасы мен Төлеби ауданының 90 жылдық мерейтойына арналған төсбелгісімен марапаттады. Лесбек Әуезханұлы өз кезегінде ақынға аудан әкімінің құттықтау хатын табыс етті. Аудандық мәслихат хатшысы жазушы Есенәлі Ералыға Төлеби ауданының 90 жылдық мерейтойына арналған төсбелгіні табыстады.
«Құрасбектің рухы сөйлейді» атты кітаптың тұсауын Мәдениет саласының майталманы Күлия Айдарбекова мен Аңдас Оразалиев қиып, суретші Құрасбек Тыныбековтың өмірлік жолы жөнінде естелік әңгімелер айтып, ақжүрек ақынның өршіл поэзиясына қатысты пікірлерін жеткізді.
Рухани кешке келген «Парасатты Қазақстан» қоғамдық бірлестігнінің мүшесі Шырынбек Оңғаров, Тұрлыбек Қозыбақов, Өмір Шыныбекұлы, Серікқали Жексенбаев , Халықаралық «Алаш» әдеби сыйлығының иегері Темірғали Көпбаевты мерейтойымен, шығармашылық кешімен құттықтап, естелік әңгімелер айты. Суретші Құттыбек Тыныбекұлы, ақынның жары Салима Қалқабаева, сатирик жазушы қазақ поэзиясының айдынында ерекше талантымен көзге түскен талантты ақынның шығармашылығы жөнінде әңгімеледі.
Басқосу барысында аудандық Мәдениет үйінің қызметкерлері әннен шашу шашып, ақынның өлеңдерінен үзінділер оқыды.
