Күллі әлем көз тіккен, әлемнің кіл мықты спортшылары жиналған Күншығыс елінде өткен байрақты бәсекеде, Қазақ елінің намысын қорғап, көк туымызды көкте желбіретіп Алаштың мерейін асырған, Түркістан облысының тарихында алғашқы Олимпиада медалін жеңіп алған, Токио Олимпиадасының қола жүлдегері, Сербия астанасы Белград қаласында өткен әлем чемпионатының алтын жүлдегері Сәкен Бибосынов киелі Қазығұрт ауданының халқымен кездесті.
Әлем чемпионы Сәкен Бибосынов, Қазығұрт ауданы Қызылқия ауылы округінде орналасқан “Қызылқия” спорт кешенінде жастармен кездесіп, келешекте еліміздің атын дүбірлі додаларда мерейін үстем ететін болашақ чемпиондармен жүздесіп, сұрақтарына жауап берді.
Өз кезегінде, Әлем чемпионы Сәкен Бибосынов, Жаңа Қазақстанның болашағы, ертеңгі келбеті жастар екендігін тілге тиек етіп, еліміздің өсіп-өркендеуі жолында ерінбей адал еңбек етуге, шақырды. Еліміздің жарқын болашағы үшін, жаман әдеттерден аулақ болуға, кемел келешек жолында ел үшін қызмет ету керек екендігін жеткізді. Сондай-ақ ертеңгі күні елдің намысын қорғайтын азамат болып өссін деген ниетте жас бүлдіршіннің тұсауын кесіп, батасын берді.
Кездесу соңында ауыл тұрғындарының атынан әлем чемпионына шапан жабылып, естелік сыйлықтар табыс етілді.
