Ордабасы ауданының әкімі Нұрбек Бадырақов Төрткөл ауылдық округіне қарасты Спатаев, Еңбекші, Нұра, Көкарал, Арыстанды, Жайылма, Ақсары ауылдары, Елшібек батыр, Қызылжар, Төрткөл елді мекендерін аралап, ауыл тұрғындарымен кездесті.
Ауылдарда уақытылы шешімін таппаған инженерлік-инфрақұрылым, ағын су, ортақ жайылым, тұрғындарға аса қажетті әлеуметтік нысандар туралы ауылдастардың өтініштерін тыңдады.
Нұрбек Бақтыбайұлы тоғыз жолдың торабында орналасқан Көкарал ауылында асарлатып салынған ескі фельдшерлік-акушерлік пункттің мүшкіл жағдайымен танысып, сала жауаптыларына ауыл тұрғындарына медициналық көмек көрсететін жаңа ФАП құрылысын жүргізу қажеттігін тапсырды.
Сапар барысында аудан әкімі Арыстанды, Нұра ауылдарындағы таза судың сапасына көңілі толмаған ауыл тұрғындарының өтініштерін де назардан тыс қалдырмады.
Аудандық «Таза су» мекемесі жауаптыларына су сапасын экспертизадан өткізуді айтып, ескірген құбырларды тез арада жаңарту керектігін ескертті.
Аудан басшысы Елшібек батыр ауылында ұзақ жылдардан бері шешімін таппаған Төрткөл төбе ЖОМ ғимаратын аралап, ауыл тұрғындары мен ұстаздардың жаңа мектеп салу ұсынысын тікелей өз қадағалуына алатынын айтып өтті.
Ауылдық округ аумағында қабырғасы қаланып жатқан білім беру, денсаулық сақтау мекемелерінің құрылыс алаңында болған аудан басшысы нысандарды алдағы ай көлемінде сапалы етіп, ел игілігіне беруді талап етті. Бұл ретте, сала жетекшілері жоспарға сәйкес жұмыстар жүргізіліп жатқанын атап өтті.
Төрткөл Мәдениет үйінде аудан әкімі Нұрбек Бадырақовпен кездескен аудан тұрғындары жаңа басшысының алғашқы жұмысын ауыл аралап, мәселені халықтың өз аузынан естімек болған бастамасына ризашылығын білдіріп, қызметіне табыс тіледі.
