Түркістан өңіріне жұмыс сапарымен келген Мәжіліс депутаттары бүгін Сайрам ауданындағы проблемалы нысандарды аралады. Халық қалаулыларының құрамында Дархан Мыңбай, Құдайберген Ержан, Қайнар Абасов және Сырым Ертаев бар.
Мақсат – «Nur Otan» партиясының сайлауалды бағдарламасының Түркістан облысында орындалуына мониторинг жасау, күрделі жөндеу және құрылыс жұмыстарын қажет ететін нысандардың жұмысымен танысу, республикалық бюджеттен қаржы бөлуге ықпал ету.
Алғашқы нысан – Қайнарбұлақ ауылындағы Ш.Уәлиханов атындағы жалпы орта мектебі. 300 оқушыға арналған оқу ордасы 2009-2010 оқу жылында пайдалануға берілген. Биылғы оқу жылында мектептің 25 сынып комплектісінде 494 оқушы және 2 мектепалды тобында 28 бала, жалпы 522 оқушы білім алуда. Қазіргі таңда мектептің 1 қабатында орналасқан бірқатар сыныптар мен бөлмелердің қабырғалары жарылып, едендері төмен түссе, 2 қабаттағы кабинеттердің шатырынан су өткен. Жылыту жүйесі дұрыс жүргізілмегенінің салдарынан бөлмелердің температурасы өте төмен. Сыртқы әжетхананың да жағдайы мәз емес қабырғалары мен едендері жарылған. Дегенмен тексеріс барысында апатты деп танылмаған.
Мектеп ғимаратына күрделі жөндеу жұмыстарын жүргізу үшін жобалық-сметалық құжаттар әзірленіп, мемлекеттік сараптама қорытындысына 2020 жылдың желтоқсан айында тіркеуге алынған. Күрделі жөндеудің сметалық құны – 675 383 млн.тг.
Мониторинг барысында Д.Мыңбай мәселелер назарсыз қалмайтынын айтты.
«Жалпы Түркістан өңірінде мектеп салу мәселесі күн тәртібінен түскен емес, түспейді де. Тіпті мына 300 балаға арналған мектепті 5-10 жылда тағы 600 балаға салу керек болады. Сондықтан салу, жоспарлау, қадағалау, бекіту мәселесінде көп кемшіліктер бар. Балалардың өміріне қауіп төндірумен бірдей. Жалпы білім министрілігінен бастап жауаптылар өздерінің міндеттерін дұрыстап орындамаса бұл мәселе тоқтамайды. Тоқтатудың ең басты жолы – Заңға бағынушылық. Сапар барысында түйген негізгі проблемаларды Парламентте көтеретін боламын. Тиісті министрліктермен бірге Заң аясында шешуге ықпал етемін. Түркістан өңірінде мектептердің жетіспеушілігі ең бірінші айтатын мәселем болады. Осындай проблемалар көп. Бірақ негізгі проблемаларды түзетсек, Түркістан өңірінің әлеуеті зор» – деді халық қалаулысы.
Екінші нысан – Қарасу ауылында салынатын көпқабатты тұрғын үйлер. Жалпы үйлердің саны – 5 , ал пәтер саны – 300. Биыл құрылыс жұмыстары басталу керек болған нысан республикалық бюджеттен қаржы бөлуді қажет етеді. Нысанның сметалық құны – 2,6 млрд.тг.
Мәжіліс депутаттары аталған нысандардың құрылыс жұмыстарына жауапты мекеме басшыларымен кездесіп, мәселелерді жан-жақты талқылады. Шешімін күткен проблема енді Парламент отырыстарында жауапты министрліктермен бірге қаралмақ.
«Жергілікті биліктің көтеріп отырған мәселелері қоғамға қажет. Бүгінгі сапарымызда олардың ұсынған тұрғын үй мәселесін шешу және спорт кешенін салуды қолдау үшін өз тарапымыздан ықпал жасаймыз. Мектепке байланысты шұғыл шаралар қолдануымыз керек. Құрылыстың сапасыздығы осындай жағдайларға әкеліп соғады. Яғни бюджеттік қаражатты тиімді пайдаланбаудың салдары деп айта аламын» деген Қ.Абасов елдің өтініші мен ұсыныстарын ескеріп, жинақталған мәселелердің оңтайлы шешілуіне ықпал ететіндерін айтты.
Еске салсақ, Мәжіліс депутаттары 17 ақпаннан бастап Түркістан облысындағы ауыл-аймақты аралап, халықтың мұң-мұқтажын тыңдап, проблемаларды жинақтауда. Жалпы 130-дан астам нысандарға барып, тұрғындармен кездесулер өткізуде. Аталған шаралар ақпанның 26-на дейін жалғасатын болады.
«Nur Otan» партиясы Түркістан облыстық филиалының баспасөз қызметі
