Түркістан облысы Жетісай қаласында облыстық аумақтық сайлау комиссиясының ұйымдастыруымен 19 наурызға белгіленген сайлауға дайындық және өткізу бойынша оқыту семинары өткізілді.
Оқыту семинарына Жетісай және Мақтаарал ауданы аумақтық сайлау комиссияларының барлық мүшелері, екі аудандағы барлық деңгейдегі округтік және учаскелік сайлау комиссияларының төрағалары мен хатшылары қатысты. Онда облыстық аумақтық сайлау комиссиясы төрағасының орынбасары Әмірдин Әлішев сайлауға байланысты барлық тақырыптар бойынша баяндама жасап, түсіндірмелер берді.
Семинарда Астана қаласында Орталық Сайлау комиссиясы өткізген семинар- тренинге қатысып келген Мақтаарал ауданы аумақтық сайлау комиссиясының хатшысы Гүлжан Қалдарбекова да сөз сөйлеп, сайлау өткізу барысындағы заң талаптарына сәйкес жаңаша өзгерістерге тоқталып, өз ойларын ортаға салды.
Оқыту семинарына екі ауданнан барлығы 280 қатысты. Семинарда алдағы өтетін сайлауға дайындық және өткізу ерекшеліктері, саяси партиялар мен кандидаттардың қатысуын қаржылық қамтамасыз ету мәселелері, кандидаттардың республикалық бюджет қаражатынан жабылатын шығыстарының мөлшерлері, сайлаушылар тізімдері бойынша, сайлау бюллетеньдері туралы жан-жақты талқыланды. Сондай-ақ есептен шығару куәліктері жөнінде, сайлау алдындағы үгіт жүргізу жұмыстары бойынша, дауыс беруге арналған үй-жайдағы тәртіп ережелері туралы, учаскелік сайлау комиссияларының сайлау өтетін күнгі заң талаптарына сәйкес атқаратын жұмыстарының алгоритмдері бойынша барлық мәселелер баяндалып, толыққанды түсіндірмелер берілді.
Оқыту семинарына қатысушылардың тарапынан көптеген сұрақтар қойылып, оларға да тиянақты жауаптар берілді.
