Мақтаарал ауданында сайлау учаскелеріне алғашқы келген сайлаушыларға Наурыз мерекесіне байланысты қазақтың ұлттық киімдері сыйға берілуде. Аудандағы ардагер қариялардан бастап алғаш рет дауыс беруге келген жастар, ақ жаулықты әжелер, ауыл келіндері, қарапайым ауыл шаруашылығы қызметкерлері, фермерлер, мұғалімдер, спортшылар, мәдениет қызметкерлері саяси науқанда белсенділік танытуда.
«Мен алғаш рет сайлауға қатысып отырмын. ҚР Парламенті мәжілісі және мәслихат депутаттарын сайлау – отандастарымыз үшін маңызды іс. Бұл болашағымызға да тікелей әсер етеді. Сондықтан, таңертеңнен тұрып, белсенділігімді көрсетіп, дауыс беруге бірінші келіп отырмын»- деді, жас сайлаушы Жансая Торғауытова.
Айта кетейік, ұлыстың ұлы күні әз-Наурыз мейрамы қарсаңында өтіп жатқан сайлауда сайлаушыларға көтеріңкі көңіл-күй сыйлау мақсатында Мақтаарал ауданының барлық учаскелерінде түрлі іс-шаралар ұйымдастырылып, концерттік бағдарламалар қойылатын болады.
