Мақтарал ауданында биылғы жаз айларында балалардың бос уақытын тиімді ұйымдастыру мақсатында екі бірдей жазғы сауықтыру лагерлері жұмысын бастады.
Аудан әкімінің орынбасары Бейсенбай Төребеков және аудандық адами әлеуетті дамыту бөлімінің басшысы Мұратбек Серікбаевтар аталған демалыс аймақтарында болып, лагерлердің маусымдық ашылуымен оқушыларды құттықтады.
Мақтаарал аудандық адами әлеуетті дамыту бөлімінің балалар мен жасөспірімдер шығармашылық орталығының балаларды жазғы сауықтыру қала сыртындағы базасының директоры Нұрғали Қалыбековтың айтуынша, екі бірдей лагерге бір мезетте 300 бала қабылданған. Жаздың соңына дейін 10 маусымда 3 мың баланы демалдыруға мүмкіндік бар екен.
Мұнда балалардың қауіпсіздігі қатаң бақылауға алынып, тәрбиешілерге үлкен жауапкершік артылып отыр. Осы мақсатта балаларға лагерлерде түнгі кезекшілік ұйымдастырылып, электр, өрт, жолда жүру, бассейнге шомылу, спорт алаңындарындағы қауіпсіздік туралы нұсқаулықтар таныстырылып, күн сайын ескертіп отырады.
Лагердің тәрбиеленушілеріне емдеу-профилактикалық, сауықтыру іс-шараларын жүргізу мақсатында ас мәзірі мен дайындау сапасы қатаң тексерілетін болады. Оқушылар 5 мезгіл тамақпен қамтамасыз етіледі. Балалардың келгендегі және кеткендегі салмағы мен бойын өлшеу, денсаулығын қадағалап отыру, сырқаттанған жағдайда алғашқы дәрігерлік көмек көрсету үшін медбикелер қызмет етуде. Баланың жеке басының гигенасын, төсек орынның тазалығын сақтауды қадағалау тәрбиешілерге жүктелген.
Демалушы балалардың ақыл-ой, сана-сезімін, дене бітімін жетілдіру бойынша да түрлі әдеби-сазды кештер, мәдени іс-шаралар, танымдық ойындар, байқаулар мен сайыстар, спорттық жарыстар өткізіледі. Бұдан бөлек, балалардың бойын сергіту үшін таза ауада арнайы серуендер ұйымдастырылады. Сондай-ақ, лагерде күн сайын би кештері өткізілмек.
