ҚР Президенті сайлауы – еліміздің әрбір тұрғыны үшін үлкен мереке. Өйткені, 7 жылға жаңадан сайланатын Президентке ел тізгіні тапсырылып, халық жаңа мемлекет басшысы арқылы өз болашағын құратын болады.
Көпті көрген мақтааралдық қазыналы қариялар бүгінгі саяси науқанның маңызы зор екенін жақсы түсінеді. Сондықтан, сайлауда белсенділік танытып, сайлаушылардың көшін бастауда.
“Біздер көптеген қиындықтарды көріп өстік. Сондықтан, бейбіт өмірдің қадірін жақсы түсінеміз. Мемлекетіміз бүтін, өміріміз бейбіт, қой үстіне бозторғай жұмыртқалаған заманда Президент сайлауын өткізіп, Мемлекет басшысын сайлап жатқанымызға шүкіршілік айтамыз. Құдайдың мұндай нығметін кейінгі жастар жете түсініп, тәуелсіз еліміздің қадіріне жетсе дейміз” – деді, 96 жастағы қария Мырзақұл Тілеубаев.
Айта кетейік, Мақтаарал ауданында таңғы 07:00-ден бастап 63 сайлау учаскесінің есіктері айқара ашылған. Ауданда 70329 сайлаушы тіркелген.
