Мемлекетке қызмет ету – халықтың сенімін ақтау, ұлтымыздың абыройын асырып, асқақтату. Әрбір өркениеттің өріне қадам бастаған мемлекеттің ең басты тірегі, оның идеясы мен саясатын алға апарушы мемлекеттік қызметкер екені белгілі. 2002 жылдың 20 желтоқсанында Біріккен Ұлттар Ұйымының Бас Ассамблеясы 23 маусымды мемлекеттік қызметкерлер күні деп белгіледі. Осы сәттен бастап мемлекеттік қызметшілер күні салтанатты жағдайда аталып өтіп келеді.

Бүгін ауданымызда мемлекеттік қызметшілер күніне арналған салтанатты жиын өтті. Мерекелік шараға аудан әкімі Сәкен Сұлтанханов арнайы қатысып, еліне адал қызмет етіп келе жатқан мемлекеттік қызметкерлерді кәсіби мерекелерімен құттықтады.

«Мемлекеттік қызметкер – мемлекеттік саясатты қалтқысыз жүзеге асыратын, мемлекет және халық тарапынан сенім білдірілген, заңмен үлкен жауапкершілік артылған тұлғалар. Сондықтан да әрбір мемлекеттік қызметші мінсіз қызметімен, жұмысындағы жақсы көрсеткіштерімен көрінуі тиіс. Өйткені, мемлекеттік қызметші жай қызметкер емес, ол – қоғам мен билік арасындағы алтын көпір, оның басты ұстанымы – өз қамы емес, елдің қамы, мемлекет мүддесі, өзі қызмет атқаратын мекемесінің абыройы болуы қажет. Мемлекеттік қызметтің мәртебелі міндет екенін терең ұғынуы тиіс. Бұл-бәріміз үшін жауапты қызмет. Өз халқың үшін қызмет ету-түсіне білгенге зор бақыт. Ендеше бүгінгі мерейлі мерекелеріңіз құтты болсын»,-дей келе, ауданымыздың экономикалық және әлеуметтік дамуы мен өсіп-өркендеуіне үлес қосып келе жатқан белсенді мемлекеттік қызметшілерді арнайы алғыс хаттармен марапаттады.

ҚР «Мемлекеттік қызмет туралы» Заңына сәйкес Көксарай ауыл округі әкімі аппаратының бас маманы Дархан Хайыпназарұлы жиналған көпшіліктің алдында ант беріп, Егемен еліміздің гүлденуі жолында өзіндік үлес қосу үшін мемлекеттік қызметші ретінде жұмысын бастады.

Ант қабылдау рәсімінен соң мемлекеттік қызметшілердің қатысуымен мерекеге арнайы дайындаған концерттік бағдарлама көпшілік назарына ұсынылып, сахнада патриоттық әндер шырқалып, шара соңы сазгер Ескендір Хасанғалиевтің «Атамекен» әнімен түйінделді.