Бұқаралық ақпарат құралдары қызметкерлерінің күніне орай Конгресс холл ғимаратында мерекелік іс-шара өтті. Өңірдің ақпарат саласының үздіктері бас қосқан жиында Түркістан облысы әкімінің орынбасары Сәкен Қалқаманов құттықтау сөз сөйледі.
Сәкен Амангелдіұлының айтуынша, демократиялы қоғам орнатуда, мемлекетті дамытуда журналистиканың маңызы зор. Кезінде Алаш ардақтысы Ахмет Байтұрсынұлы «Газет – халықтың көзі, құлағы һәм тілі» деп ой түйіндеп, журналистика саласының маңызы тереңде екенін айтқан. Қазір ақпараттық технология дамып, газет, телеарна радиодан бөлек интернет сайттары мен порталдардың жұмысы күшейді, жаңалықты жедел ұсынудың жолдары көбейді. Әлеуметтік желілердің өзі ақпарат таратуда маңызға ие болып отыр. Журналистика саласына артылар жүк ауырлап, «төртінші билік» өкілдерінен біліктілік пен шапшаңдық, шынайы отаншылдық талап етілуде.
– Сіздерді 28 маусым – Бұқаралық ақпарат құралдары қызметкерлері күнімен шын жүректен құттықтаймын! Ел Президенті Қасым-Жомарт Тоқаев наурыз айындағы Жолдауында «Тәуелсіз әрі жауапкершілігі жоғары бұқаралық ақпарат құралдары болмаса, қоғамды одан әрі демократияландыру мүмкін емес екеніне сенімдімін. Бұқаралық ақпарат құралдары билік пен халықтың арасындағы тиімді байланыс арнасы бола отырып, елдегі қордаланған мәселелерді көтере алады және көтеруге міндетті» деген болатын. Бұл ретте Түркістан облысының БАҚ өкілдері өздеріне жүктелген міндетті абыроймен атқарып, ел мүддесі жолында аянбай еңбек етіп келеді. Түркістан облысында 85 бұқаралық ақпарат құралы тіркелген. Өңірдегі газеттер мен телеарналар, журналдар мен ақпараттық порталдар және радиоарнадағы журналистер қауымы Жаңа Қазақстанды қалыптастыру, Түркістан облысын дамыту, Түркістанды – Түркі әлемінің орталығына айналдыру бағытында қарқынды жұмыс істеп жүр. Ашылғанына көп бола қоймаған «Turkistan» телеарнасы да өз көрерменін тауып, республикалық деңгейде мойындала бастады. Күні кеше өңір журналистері Қарағанды төрінде өткен спартакиадада бірнеше спорт түрінен бақ сынап, командалық бірінші орынды еншіледі. Бұл – БАҚ өкілдерінің бірлігі мен рухтарының мықтылығының белгісі. Біздің отаншыл журналистеріміз өңірдің ақпараттық-идеологиялық саясатын жүргізуге, экономикасы мен әлеуметтік дамуына үлес қосып жүргені ақиқат. Осы еңбектеріңіз бен мамандыққа және ел аманатына деген адалдықтарыңыз үшін алғысымды білдіремін, – деді облыс әкімінің орынбасары.
Шара барысында ақпарат саласына еңбегі сіңгені үшін «Еңбек ардагері» медалімен «Оңтүстік Қазақстан» газеті Бас редакторының бірінші орынбасары Нұрлан Кенжеғұлов, «Ақпарат саласының үздігі» төсбелгісімен «Қазақстан» телеарнасының Түркістан облысы бойынша меншікті тілшісі Айнұр Ақбаева және «Айғақ» телеарнасының бас редакторы Ұлжан Наушабаева, ҚР Президентінің «Халық алғысы» медалімен «Рейтинг» ақпараттық-сараптамалық апталығының бас редакторы Бақытжан Әбдірашұлы марапатталады. Сонымен қатар аймақтағы ақпарат саласының бірқатар майталмандарына Түркістан облысының әкімі Өмірзақ Шөкеевтің Грамотасы мен Алғыс хаты, Түркістан облысы мәслихатының хатшысы Қайрат Балабиевтің Алғыс хаты, «Amanat» партиясы Түркістан облыстық филиалының Атқарушы хатшысы Бейсен Тәжібаевтың Алғыс хаты және Түркістан қаласының әкімі Нұрбол Тұрашбековтің Алғыс хаты табысталды. Сондай-ақ БАҚ өкілдері арасында төрт жылда бір мәрте өткізілетін Республикалық спартакиадада топ жарған Түркістан облысының құрамасына арнайы Алғыс хат берілді. БАҚ қызметкерлері күніне орай өткізілген мерекелік іс-шара концерттік бағдарламаға ұласты.
