Бүгін Түркістан облыстық тарихи-өлкетану музейінде қазақ телевизиясының ардагері, Қазақстан Журналистер одағы сыйлығының екі мәрте лауреаты, «Алтын Жұлдыз» сыйлығының иегері, ел мәдениетіне еңбегі сіңген қайраткер, Қазақ ұлттық өнер академиясының профессоры, Ақсу ауданының «Құрметті азаматы» Нұртілеу Иманғалиұлының 70 жылдығына арналған «Бай-қуатты болайық!» атты көшпелі көрмесінің ашылу салтанаты өтті.
Ашылу салтанатына Нұртілеу Иманғалиұлының жұбайы Қарлығаш Табылдинова, Нұртілеу Иманғалиұлының рухани інісі әрі досы ҚР Еңбек сіңірген қайраткері Амантай Берғалиев, Түркістан облысы мәдениет басқармасының басшысы Әзімхан Қойлыбаев, Шымкент қаласы әкімінің бірінші орынбасары Шыңғыс Мұқан, «Turkistan» телеарнасының Бас директоры Жанахмет Ағыбаев қатысып, нар тұлға жайлы естеліктерімен бөлісті. Көрмеге келушілер ерекше көңіл-күймен тарқасты.
Ол қазақ телевизиясында тілші, редактор, аға редактор, комментатор, бас редактор, саяси шолушы, директордың орынбасары, «Хабар» агенттігінде модератор-жүргізуші, одан кейін Үкімет кеңсесінде сектор меңгерушісі, Президент Әкімшілігінде бас маман болған. Сонымен қатар Коррупцияға қарсы күрес жөніндегі мемлекеттік комиссиясының мүшесі, «Қазақстан» РТРК» АҚ Басқарма Төрағасы қызметін атқарған Нұртілеу Иманғалиұлы ғұмырының 35 жылын телевизияға арнаған.
Оның алғаш «Жадыңда ма, жолдас?!» хабарынан бастаған. Содан соң талайдың санасын қозғаған, саяси-әлеуметтік салмағымен, әсіресе шыншылдығымен телекөрерменнің есінде сақталған бағдарламалары: «Жас жігер», «Көзқарас», «Алтыбақан», «Айна», «Заң мен заман», «Ақиқат пен аңыз», «Дидар», «Жастар дауысы», «Арай», «Көкпар», «Ой-көкпар», «Бетпе-бет», «Дін мен діл», «Арнайы репортаж», «Діңгек», «Қолтаңба» т.б.
