Сарыағаш ауданы Қызылжар ауылдық округіндегі көшелерге асфальт төсеу жұмыстарына аудан әкімі Мұхит Отаршиев арнайы барып, ауыл тұрғындарының қатысуымен кезекті қоғамдық бақылау жұмыстарын жүргізді.
Қоғамдық бақылауға ауданның жолаушылар көлігі және автомобиль жолдары бөлімінің басшысы, Қызылжар ауылдық округінің әкімі, ауыл биі, ақсақалдары, жол құрылыстарының сапасын анықтау мақсатында «Ұлттық жол активтері сапасы орталығы» РМК Түркістан облысы бойынша филиалы мамандары, мердігер және техникалық қадағалаушы мекемелердің басшылары қатысты.
Қоғамдық бақылау барысында аталған елді мекендегі Иса Сағынұлы көшесіне төселген асфальт жамылғысының сапасы «Ұлттық жол активтері сапасы орталығы» РМК Түркістан облысы бойынша филиалы мамандары тарапынан асфальттің құрамын, тығыздығын, қалыңдығын анықтау мақсатында асфальт жамылғысынан кесінді алынып, зертханалық тексеруге жіберілді.
«Ағымдағы жылдың 6 шілде күні Құркелес ауылдық округіне қарасты Жаңаталап елді мекенінің көшелеріндегі жол құрылысы жұмыстарына қоғамдық бақылау жүргізілген болатын. Бүгін міне Қызылжар елді мекеніндегі жүргізіліп жатқан жол құрылыстарының сапасына қоғамдық бақылау жүргіздік. Ағымдағы жылы «Ауыл – Ел бесігі» бағдарламасы аясында Қызылжар ауылдық округіндегі 13 көшенің 11 шақырымына асфальт төсеу жұмыстары жүргізілуде. Ел игілігі үшін жүргізіліп жатқан құрылыс жұмыстары бірінші кезекте сапалы болуы және белгіленген мерзімде халық игілігіне берілуі тиіс» – деді аудан басшысы Мұхит Баймұханбетұлы.
Айта кетсек, алдағы уақытта да ауданға қарасты барлық жол құрылыстары бақылауға алынып, жылжымалы жол зертханалық көліктері және арнайы құралдар арқылы тексеру және қоғамдық бақылау жұмыстары жүйелі түрде жүргізілетін болады.
