Еліміздің рухани астанасы – Түркістан, тек тарихи-мәдени орталық қана емес, бірлік пен бейбітшілікке негізделген қоғамдық келісімнің алтын діңгегіне айналған киелі өңір. Осы ұлы мұратты іске асыруда Қазақстан халқы Ассамблеясы жанындағы Аналар кеңесінің үлесі зор. Ел ішінде ынтымақ пен ырысты тірліктің орнауына қызмет ететін бұл кеңес – бүгінгі күннің өрелі міндеттерін атқаруда, әсіресе рухани-адамгершілік тәрбие, отбасылық құндылықтарды дәріптеу және ұлттар арасындағы бейбіт тірлікті сақтау бағытында ерен еңбек етіп келеді.
Аналар кеңесі – ұрпақ тәрбиесінің ұйытқысына айналып отыр. Қоғамдағы әрбір отбасының тағдыры ананың қолында десек, сол аналардың басын қосатын және оларды қоғамдық іске жұмылдыратын Аналар кеңесінің маңызы ерекше. Түркістан облысында бұл бағыттағы жұмыс жүйелі түрде жолға қойылған. Гүлсара Тоққұлова басқаратын облыстық Аналар кеңесі ел ішіндегі түрлі этностардың әйелдер қауымын, белсенді аналарды, тәлімгер әжелер мен көпбалалы ана тұлғаларын бір ортаға топтастырып, ел болашағы – жас ұрпақ тәрбиесіне айрықша көңіл бөліп отыр.
Аналар кеңесінің ең негізгі бағыты – отбасы құндылықтарын дәріптеу, ұлт тәрбиесінің өзегін сақтау. Түркістан облысының барлық аудандарында кеңестің филиалдары жұмыс істейді. Олар мектептермен, ішкі істер органдарымен, жастар ұйымдарымен, қоғамдық бірлестіктермен бірлесе отырып, жасөспірімдер арасындағы құқық бұзушылықтың алдын алу, ерте жүктіліктің салдарын түсіндіру, отбасылық жанжалдардың түйінін тарқату сияқты мәселелермен айналысады. Мысалы, “Салауатты сана” жобасы аясында өткізілген кездесулерде тұрмыстық зорлық-зомбылықтың алдын алу, әйелдердің құқықтық сауаттылығын арттыру, қыз балаларды ибалыққа тәрбиелеу секілді өзекті тақырыптар кеңінен талқыланған. Бұл – ананың дауысымен, жылы жүрегімен айтылған ақылдың қоғамдық сананы қалай өзгерте алатынының айқын көрінісі.
Аналар кеңесі этносаралық келісімді нығайтуда да ерекше миссия атқарады. Түркістан – көпұлтты аймақ. Мұнда өзбек, түрік, татар, орыс, күрд, әзербайжан және басқа да этностар мекендейді. Кеңес мүшелері осы этностардың аналарымен, этномәдени бірлестіктермен етене байланыс орнатып, ортақ отбасылық және мәдени құндылықтарды насихаттап келеді. Бұл – тек бейбітшілік кепілі ғана емес, ұлттық тұтастықтың тірегі.
Кеңестің тағы бір маңызды бағыты – жастар тәрбиесіне басымдық беру. Түркістан қаласында, сондай-ақ аудан, ауылдарда ұйымдастырылған кездесулерде Аналар кеңесінің мүшелері жас қыздармен бетпе-бет сөйлесіп, өмірлік тәжірибелерімен бөліседі. Олар қыз бала тәрбиесін отбасының ғана емес, тұтас ұлттың аманатына балап, әрбір жасқа жеке көңіл бөледі. «Ибалы қыз – елдің көркі», «Ана мен бала – ұлттың негізі» атты іс-шаралар жастардың өмірлік таңдауларын, тұлғалық дамуын ұлттық құндылықтармен үйлестіруге бағытталған. Бұл – ассамблеяның аналар арқылы жүрекке жеткізген жұмсақ, бірақ терең идеологиясы. Қазақстан Республикасының Президенті Қасым-Жомарт Тоқаев өз сөздерінде үнемі ұлттық бірлік пен әлеуметтік келісім мәселесін алдыңғы қатарға қояды. Мемлекет басшысы «Біздің бірлігіміз – көптүрлілікте. Бұл – біздің басты байлығымыз» дей отырып, әр азаматтың, әр этностың осы елдің тағдырына жауапты екенін атап өтеді. Мұндай тұжырым – нағыз мемлекетшілдік және адамгершілікке негізделген формула.
Мемлекет басшысының тапсырмасымен жүзеге асып жатқан «Ұлттық құрылтай», «Халық үніне құлақ асатын мемлекет» қағидаттары да – осы келісім мен бірлікке ұмтылған нақты қадамдар. Бұл бастамалар азаматтық қоғам мен мемлекетті жақындатуға, әр адамның үнін естуге бағытталған.
Түркістан облыстық Аналар кеңесі жыл сайын республикалық деңгейде танылып келеді. Арыс, Жетісай, Кентау, Түлкібас секілді аудандарда белсенді жұмыс істейтін кеңес мүшелері ұлттық форумдарға қатысып, тәжірибе бөлісіп, басқа өңірлерге үлгі. 2025 жылы ауылдарда өткен кеңейтілген отырыстарда Аналар кеңесі мемлекеттік органдармен бірге азаматтардың құқықтық және рухани тәрбиесін күшейту, қоғамдық келісімді нығайту бағытында талқылаулар ұйымдастырды. Онда жастар арасында патриоттық тәрбие беру, этномедиация, көпбалалы аналарға қолдау сияқты нақты міндеттер белгіленді.
Айта кетейік, Түркістан облыстық Қазақстан халқы Ассамблеясы еліміздегі этносаралық татулық пен тұрақтылықты сақтау жолында ауқымды жұмыстар атқарып келеді. Атап айқанда, облыста «Салауатты сана», «Адал азамат», «Елтану», «Мың бала», «Қайырымдылық керуені», «Жаңа толқын», «Шаңырақ» жобалары сәтті жүзеге асырылып жатыр. Жыл басынан бері 631 іс-шара мен 49 қайырымдылық акциясы өткізіліп, 39 мыңға жуық адам қамтылды. Сонымен қатар 168 ақпараттық-насихаттық кездесу өткізіліп, оған 9000-ға жуық тұрғын қатысты.
