Бүгін Түркістан қаласындағы «Достық үйінде» облыстық Қазақстан халқы Ассамблеясы жанындағы Аналар кеңесінің «Салауатты сана» жобасы аясында «Аналардың қоғамдық мәдени өмірге қатысу шеңберін кеңейту» және “Ибалы қыз – өмір көркі” тақырыбында дөңгелек үстел өтті.
Алқалы басқосуға облыстық ҚХА жанындағы қалалық, аудандық Аналар кеңесінің төрайымдары мен мүшелері, этномәдени бірлестіктер өкілдері, «Ассамблея жастары» РҚБ Түркістан облыстық өкілдігінің мүшелері, жастар қатысты.
Келелі жиында Түркістан облыстық қоғамдық даму басқармасы «Қоғамдық келісім» КММ-і басшысының орынбасары Ерназар Баетов қоғамдағы аналардың рөлі мен жауапкершілігі және ұрпақ тәрбиесі туралы салиқалы сөз қозғады, сондай-ақ Мемлекет басшысының ҚХА сессиясында және Ұлттық құрылтайда берген тапсырмаларының орындалу барысына тоқталды.
– Аналар кеңесінің негізгі мақсаты – қоғамдағы береке-бірлікті, келісімді нығайту. Сонымен қатар, отбасы институтын сақтауға ықпал ету, өскелең ұрпақты патриоттық рухта тәрбиелеуге, жасөспірімдер арасындағы құқық бұзушылықтың алдын алуға үлес қосу. Осы бағыттағы жұмыстарды Түркістан облысы ҚХА жанындағы Аналар кеңесі ары қарай жандандыра бермек, – деді Ерназар Көпжасарұлы.
Жиында белгілі болғандай, қазіргі таңда Түркістан облыстық ҚХА жанындағы Аналар кеңесі 1200-ден аса белсенді ананың басын қосып отыр. Кеңес құрамында өңірдің қоғамдық өміріне белсене араласып жүрген белгілі педагогтар, дәрігерлер, этномәдени бірлестіктер өкілдері, зейнеткерлер, ҮЕҰ мен БАҚ өкілдері, жеке кәсіпкерлер, үй шаруасындағы, мәдениет саласындағы, сондай-ақ мемлекеттік қызметкерлер, әлеуметтік қызметкерлер бар. Жалпы жыл басынан бері ҚХА жанындағы облыс, аудан қалалардағы Аналар кеңесінің ұйытқы болуымен 80-нен аса іс-шара өткізілген.
Күн тәртібіне сәйкес, жиында Аналардың қоғамдық, мәдени өмірге қатысу шеңберін кеңейту жөнінде облыстық ҚХА жанындағы Түркістан қалалық Аналар кеңесінің төрайымы Гүлбарам Малбаева, «Салауатты сана» жобасының нашақорлық тармағы бойынша атқарылған жұмыстар жөнінде Түркістан облысы Полиция департаменті есірткі қылмысына қарсы іс-қимыл басқармасының аса маңызды істер жөнінде аға жедел уәкілі, полиция майоры Марат Бимаханов және «Ибалы қыз – өмір көркі» тақырыбында Түркістан қалалық Аналар кеңесінің белсенді мүшесі Несіпкүл Мейманханқызы баяндама жасады.
Басқосу ары қарай сұрақ-жауап түрінде өрбіп, жиынға қатысушылар өзекті мәселелер төңірегінде өзара пікір алмасып, ойларын ортаға салды.
Жиынды қорытындылаған «Қоғамдық келісім» КММ-і басшысының орынбасары Ерназар Баетов отбасы құндылықтарын нығайту бағытындағы жұмыстар ұлттық дәстүрді негізге ала отырып жүйелі жалғаса беретіндігін жеткізді.
