Әрбір түркістандық бай-қуатты, тұғыры биік, болашағы жарқын елде өмір сүруге лайық. 30 жыл бойы өтірікпен көзімізді бояп, санамызды улап, кредитке батырып, жүйені шірітіп, тоналып жатқанымыз осымен жетер! Жаңа Қазақстан құрамыз десек, барлығын басынан жаңарту керек. Егер, мені кіндік қаным тамған киелі қаланың болашағы алаңдатпаса, өз еңбегіммен жинаған дүнием өзіме жетеді, зейнеткермін деп, тып-тыныш, қалған өмірімді сүре берер едім. Өңірімізде болып жатқан әділетсіздік пен заңсыздық мені тыныш жатқызбай, сырттан бақылап отыруға ар-намысым жібермеді.
Сондықтан, егер облыстық мәслихаттың депутаты болсам, мына төмендегі мәселелерді бар қажыр-қайратыммен қозғауға және оның орындалуы үшін түбіне дейін жетуге белімді бекем байладым:
- Индустриалдық аймаққа микрофибралық талшықтардан заттар шығаратын тоқыма фабрикасын салып, жұмыссыз жүрген 500-ге жуық адамдарды жұмыспен қамтамасыз ету.
- Халықаралық қазақ-түрік университетіне 1500 орындық студенттер жатақханасын салуға бастама көтеріп, инвестор тарту.
- Шахмат ойынына жас ұрпақтарды баулу мақсатында Түркістан қаласында «Шахмат мектебін» салуға атсалысу.
- Киелі кесенені «Әзірет Сұлтан» мемлекеттік тарихи қорық мұражайынан бөліп алып, «Қожа Ахмет Ясауи» мавзолейі ұлттық туристік мекеме етіп қайта құруға жұмыс жасау керек.
- Әлемдік дін конфессиалары басшыларының бас қосуын Түркістан
қаласында өткізуді дәстүрге айналдыруға бастама көтеру.
- Облысты мекендеп жатқан ұлт өкілдерінің тілдеріне құрметпен
қарай отырып, мемлекеттік тілді ұлтаралық қатынас тіліне
айналдыруға күш салу. Облыстық жарнамалық-көрнекілік
құралдарын заңға сәйкес ретке келтіру.
- Кезінде қаланың орталығында тұрған тарихы терең, ең байырғы
сәулеті жарасқан А.Байтұрсынов мектебі халықтың тілегі
ескерілмей бұзылды. Сол аймақтағы оқушылар жан-жаққа тарап
кетуге мәжбүр болды. Сол жерде тұрған әскери комиссариатты
басқа мекенге көшіріп, орнына заманауи қазақ-өзбек
гимназиясын салуға ықпал ету.
- Хамза, Әмір Темір және Қазыбек би атындағы мектептердің
тозғандығы белгілі. Оларды жаңартуға бастама көтеру.
- Медициналық колледжге спорттық кешен салуға жұмыс жасау.
- Халықтың денсаулығын жақсарту мақсатында Түркістан қаласында онкологиялық ауруларды тексеретін, емдейтін орталық ашуға бастама көтеру.
Құрметті сайлаушылар!.
Өскелең ұрпағымыз дамыған, бай-қуатты, әділетті Жаңа Қазақстанда өмір сүруі тиіс. Оларға жағдай жасау біздің басты мақсатымыз. Егер маған сенім артып, дауыс берсеңіздер, қолымнан келгенше аянбай қызмет етуге дайынмын!
