Бүгін Түркістан облысы әкімінің орынбасары Нұралхан Көшеров «Sas-Tobe Technologies» ЖШС жұмысшыларымен кездесті.
Аудандағы ең ірі өндіріс ошақтарының бірі саналатын «Sas-Tobe Technologies» ЖШС-де 567 адам жұмыс істейді. Жылына 450 мың тонна сұр цемент, 90 мың тонна әк өндіретін зауыттың бүгінде банк алдындағы қарызын өтеу мәселесі күрделі болып тұр.
Аталған мәселені жан-жақты талқылап, тиімді шешім қабылдау мақсатында өндіріс ошағына облыс әкімінің орынбасары Нұралхан Көшеров арнайы барып, зауыт басшылығы және жұмысшыларымен кездесіп, өтініш-ұсыныстарын тыңдады. Кездесуге аудан әкімі Н.Байғұт және аудан прокуроры, облыстық еңбек инспекциясы басшысы мен салық басқармасы басшысының орынбасары қатысты.
Зауыт жұмысының қалыпты режимін қамтамасыз ету туралы ұсыныстарын ортаға салған жұмысшылар кәсіпорын басшылығы айлықты уақытылы беріп келгенін жеткізіп, облыс әкімінің орынбасарынан қолдау сұрады.
Нұралхан Оралбайұлы жұмысшылардың өтініші назарға алынып, мемлекет тарапынан қолдау көрсету мақсатында заң аясында тиісті шаралар атқарылатынын атап өтті.
