Түркістан облысы мал шаруашылығы мен ет экспортынан көш бастап тұр

137

ірі қара төрт түлік
Фото: Түркістан облысы әкімдігі

ТҮРКІСТАН. KAZINFORM — Қазақстан Республикасындағы мерекелер туралы заңға сәйкес, жыл сайын елімізде маусым айының екінші жексенбісінде Малшылар күні кәсіби мерекесі атап өтіледі. Түркістан облысының мал шаруашылығы саласы елімізде жетекші орында. Мемлекеттік қолдау мен атқарылып жатқан жұмыстың нәтижесінде мал шаруашылығы қарқынды даму жолына түсті.

Өткен жылы мал шаруашылығы өнімі 470 млрд теңгеге жетіп,  республикада 1-орынға шықты немесе үлесі 11% құрады.

Еліміздегі ірі қара мал санының 13 пайызы, қойдың 22 пайызы, жылқының 11 пайызы, түйенің 15 пайызы, өндірілген еттің 13 пайызы, сүттің 16 пайызы — өңірдің үлесінде.

Облыстағы қой басының 14%, ІҚМ, жылқының 5%, түйенің 7% — асыл тұқымды.

2024 жылдың 4 айында ірі қара мал саны — 1 млн 232,5 мың бас болды, ал қой мен ешкі — 5 млн 502,4 мың, жылқы — 484,8 мың бас, түйе — 44,5 мың бас, құс — 2 млн 085,5 мың бас.

78,4 мың тонна ет, 235,33 мың тонна сүт, 78,3 млн дана жұмыртқа өндірілді.

Ет экспорты бойынша Түркістан облысы республикада көш басында. Экспортқа шығарылатын ірі қара мал етінің 80%, ұсақ мал етінің 75% облыстың еншісінде (2023 жылы 10,9 мың тонна ІҚМ, 5 мың тонна қой еті экспорталды).

ет
Фото: Түркістан облысы әкімдігі

Мал шаруашылығы өнімдерінің экспорттық көлемін ұлғайтуда өңірде бордақылау алаңдары мен кешендерін жүйелі дамыту ісі оң септігін тигізіп отыр. Облыста жалпы 9183 ірі қара мал бордақылау алаңы бар.

Оның ішінде 400 басқа дейін — 9148, 400 бастан 1000 басқа дейін — 13, 1000 бастан жоғары — 22 мал бордақылау алаңы жұмыс істеп тұр.

Облыста мал шаруашылығы өнімдерін қайта өңдеуде ет өнімдерін өңдейтін 7 (24,6 мың тонна), сүт өнімдерін өңдейтін (143,2 мың тонна) 23 кәсіпорын жұмыс істейді.

Осы кәсіпорындар есебінен облыста өндірілген еттің 29%, сүттің 21,5% қайта өңделіп, нарыққа шығарылып жатыр.

Атап айтқанда, «Қарқын-2030» ЖШС-нің «Narlen» маркасымен шұжық, жұмыртқа өнімдері, «Айкан» ЖШС-нің «Эмир» маркасымен сүт өнімдері, «Бөрте милка» ЖШС-нің «Бөрте Милка» маркасымен сүт өнімдері Қазақстан нарығында жоғары сұранысқа ие болып, брендке айнала білді.

Сүт өнімдерін өңдеу кәсіпорындарының қуатын арттыру бойынша жалпы құны 10,5 млрд теңгені құрайтын 3 ірі тауарлы сүт фермасы инвестициялық жобалары жүзеге асып жатыр.

Бұл жобаларды қолдауға республикалық бюджеттен жылдық 2,5% мөлшерлемемен 6 млрд теңге қаржы бөлінді.

Олар — «БНК АГРО KZ» ЖШС, «Бөрте Милка» ЖШС, «Sultan Agro» ЖШС.

Жобалар түркиялық «Sezer», Швециялық «De-Ieval» автоматты технологиялық қондырғыларымен жабдықталады.

сүт зауыты
Фото: Түркістан облысы әкімдігі

Дания, Мажарстан мемлекеттерінен өнімділігі жоғары Голштин тұқымды 1600 бас және Симментал тұқымды 600 бас аналық ірі қара мал әкелінеді.

Осы жобалар арқылы жылына қосымша 10,4 мың тонна сүт өнімі өндіріледі.