Түркістан облысының әкімі Нұралхан Көшеров Сауран ауданына жұмыс сапарымен барып, Шорнақ ауылында бой көтерген жаңа спорт кешенінің ашылу салтанатына қатысты. Облыс әкімі тұрғындарды спорт нысанының ашылуымен құттықтап, бұқаралық спортты дамыту – мемлекет саясатының басым бағыттарының бірі екенін атап өтті. Заманауи талаптарға сай салынған спорт нысаны аудан тұрғындарының салауатты өмір салтын ұстануына мүмкіндік беріп қана қоймай, елді мекеннің әлеуметтік-экономикалық дамуына да өзіндік үлесін қосады.
– Бүгін қасиетті Сауран жерінде тағы бір игілікті істің куәсі болып отырмыз. Баршаңызды Шорнақ ауылындағы жаңа спорт кешенінің ашылуымен шын жүректен құттықтаймын! Бұл – ауылдың ғана емес, бүкіл өңірдің қуанышы. Спорт – жай ғана дене шынықтыру емес, ол – ұлттың саулығы, жастардың темірдей тәртібі және елдің болашағы. Мемлекет басшысы Қасым-Жомарт Кемелұлы Тоқаев бұқаралық спортты дамыту – ұлт саулығына салынған инвестиция екенін үнемі айтып келеді. Президент тапсырмасына сәйкес Түркістан облысында спорт инфрақұрылымын дамытуға ерекше мән беріліп, соңғы екі жылда 28 спорт кешені пайдалануға берілді. Ал, осы жылы 9 спорт кешенің құрылысы аяқталып, ел игілігіне беру жоспарлануда. Міне, солардың алғашқысының ашылауында бас қосып отырмыз. Қасиетті Түркістан өңірі – талай саңлақты дүниеге әкелген киелі мекен. Бүгінгі кешеннің табалдырығын аттаған әрбір жас өз арманына бір қадам жақындайды. Осында жаттығып, шыңдалған жастардың арасынан Азияны, Әлемді бағындыратын, Олимпиада төрінде Әнұранымызды шырқататын чемпиондар шығатынына кәміл сенемін. Жаңа спорт кешені ел игілігіне қызмет етіп, ауылдың ажарын кіргізер құтты орын болсын! – деген Нұралхан Оралбайұлы жаңа нысанды аралап, оның материалдық-техникалық базасымен және тұрғындарға жасалған мүмкіндіктермен танысты. Жасөспірімдермен кездесіп, пікірлесті.
Нысанның құрылысы 2024 жылдың тамыз айында басталған. Жалпы құны 1 млрд 733,6 млн теңгені құрайды. 1 гектар аумақта орналасқан спорт кешенінде баскетбол, бокс, күрес және тренажер залдары қарастырылған. Мұнда 40 жаңа жұмыс орны құрылды. Нысан инженерлік инфрақұрылыммен толық қамтылған.
Спорт кешенінің ашылуы ең алдымен балалар мен жастардың бос уақытын тиімді ұйымдастыруға мүмкіндік береді. Жастардың спортқа тұрақты түрде тартылуы олардың денсаулығын нығайтып қана қоймай, қоғамдағы белсенділігін арттырады. Спорттық үйірмелер мен секциялардың жұмысы жолға қойылған жағдайда жаңа нысан ауданның жас буынын тәрбиелеудің маңызды орталығына айналады. Жаңа спорт нысанының экономикалық маңызы да бар. Кешеннің тұрақты жұмыс істеуі үшін жаттықтырушылар, әкімшілік қызметкерлері, техникалық мамандар және басқа да қызметкерлер қажет. Осы арқылы жергілікті тұрғындар үшін жаңа жұмыс орындары қалыптасады. Сонымен қатар спорт кешенінің айналасында қызмет көрсету, сауда, тамақтану және спорттық жабдықтармен қамтамасыз ету секілді шағын кәсіпкерлік бағыттарының дамуына мүмкіндік туады.
Сонымен бірге жаңа спорт кешені Сауран ауданының тұрғындары үшін қызметтерді аудан аумағында алуға мүмкіндік береді. Бұрын белгілі бір спорттық жаттығулар немесе жарыстар үшін басқа елді мекендерге баруға тура келсе, енді қажетті жағдайдың жергілікті жерде жасалуы уақыт пен шығынды азайтады. Бұл ауданның әлеуметтік инфрақұрылымдық тұрғыдан өзін-өзі қамтамасыз ету деңгейін арттырады.
Спорттық нысандардың көбеюі ауданның инвестициялық және әлеуметтік тартымдылығына да оң әсер етеді. Инвесторлар үшін тек өндірістік инфрақұрылым ғана емес, жұмысшылар мен олардың отбасылары үшін қолайлы өмір сүру ортасының болуы маңызды. Сапалы спорт, білім, медицина және мәдениет нысандары қалыптасқан аумақ жаңа жобаларды тартуға қолайлы орта қалыптастырады.
Аудан экономикасының тұрақты дамуы үшін әлеуметтік және экономикалық жобалардың өзара байланысы маңызды. Егер өндіріс пен кәсіпкерлік жаңа жұмыс орындарын қалыптастырса, әлеуметтік инфрақұрылым халықтың сол аумақта тұрақты өмір сүруіне қажетті жағдай жасайды. Сондықтан спорт кешенінің пайдалануға берілуін ауданның ұзақ мерзімді даму стратегиясының бір бөлігі ретінде қарастыруға болады.
