ТҮРКІСТАН ОБЛЫСЫ “ЖЫЛДЫҢ ЦИФРЛЫҚ ТРАНСФОРМАЦИЯСЫ” НОМИНАЦИЯСЫН ИЕЛЕНДІ

194

ҚР Цифрлық даму, инновациялар және аэроғарыш өнеркәсібі министрлігінің ұйымдастыруымен Астана қаласында «Digital Transformation Conference 2025» іс-шарасы өтті. Онда Қазақстандағы цифрлық трансформацияның негізгі бағыттары талқыланып, жаңа технологияларды енгізу мәселелері қаралды.

Конференция барысында ҚР МЦРИАП Вице-министрі Асхат Оразбеков құттықтау сөз сөйлеп, үш номинация бойынша марапаттарды табыстады. Онда Түркістан облысы Қазақстан өңірлері арасында “Жылдың цифрлық трансформациясы” номинациясын иеленді. Сондай-ақ, Атырау облысы «смарт мектептер» бойынша, Қостанай облысы аймақты «интернетпен қамту» саласынан үздіктер қатарынан көрінді.

– Қазақстанда цифрлық трансформацияны жеделдету мақсатында аймақтар арасында үздік тәжірибемен алмасу өтіп жатыр. Бүгінгі іс-шарада Түркістан облысы цифрлық салада үздіктер қатарынан көрінді. Бұнымен жұмыстар тоқтамайды. Ары қарай да бұндай көрсеткіштер жалғасатын болады, – деді Түркістан облысының цифрландыру, мемлекеттік қызметтер көрсету және архивтер басқармасының басшысы Марат Айнабеков.

Аймақтың үздік көрсеткіштері:

✅ Мобильді интернетпен қамту кеңейіп, 149 жаңа елдімекен қосылды;
✅ 5G таралымы алғаш рет аудан орталықтарында іске қосылды; Түркістан қаласынан бөлек, Сарыағаш пен Жетісайда да жаңа технология қолжетімді болды;
✅ IT-білім беруді жаңа деңгейге көтеру мақсатында алғаш болып жасанды интеллект мектептері ашыла бастады.
✅ Қытайдың жетекші IT-компанияларымен әріптестік орнатылды. Компьютер жабдықтары, телекоммуникация, бағдарламалау және әлеуметтік медиа саласындағы Қытайдың үздік компанияларымен байланыс жолға қойылды.
✅ Халықаралық IT Park және Woosong IT университетінің филиалын ашу туралы келісім жасалды. Алғашқы келісім Қытайдың Beijing Fende компаниясымен және Кореяның Woosong IT университетімен бекітілді.

Еске салсақ, Ұлттық статистика бюросының дерегіне сәйкес, 2024 жылдың қаңтар-желтоқсан айларында Түркістан облысында «Ақпарат және байланыс» саласында көрсетілген қызметтер көлемі 10,1 млрд теңгені құрады. Өткен жылмен салыстырғанда 114 % өсімді көрсетіп, республика бойынша көш басында тұр.