2022 жылдың 1 қыркүйегіне дейін елімізге әкелінген шетелдік автокөліктерді заңдастыру науқаны биылғы 23 қаңтарда басталған болатын. Осы бағытта Түркістан облысының полицейлері жүйелі жұмыс жүргізуде.
Акция басталғалы Түркістан облысында шетелдік 102 көлікке қазақстандық нөмір беріліп, тіркеуден өтті. Мәселен, бір реттік акция барысында шетелдік көлігі бар 2400-ден астам тұрғынның өтініші келіп түсті. Оның ішінде 616 автокөлік деректер базасы бойынша тексерулерден өтті.
Соның нәтижесінде барлық талапқа сай келетін 102 шетелдік көлік толық бақылаудан өтіп, қазақстандық нөмір алды. Осы 102 көліктің 1-еуі ғана Арменияның көлігі болса, қалғаны Ресейге тиесілі.
Аталған акция 2023 жылдың 1 шілдесіне дейін жалғасады. Тіркеу үшін көлік иесінен өтініш, өтініш берушінің жеке куәлігі, көлік құралының паспорты немесе көлік құралын тіркеу туралы куәлігі, көлік құралына меншік құқығын растайтын құжат қажет.
Айта кетейік, шетелдік көліктерді тіркеу Түркістан облысы бойынша 5 мамандандырылған ХҚО-да, яғни Түркістан қаласында, Мақтаарал, Ордабасы, Сайрам және Сарыағаш аудандарында жүргізіледі.
