Түркістан облысында «Таза Қазақстан» жалпыұлттық экологиялық акциясы аясында «Асарлату» экологиялық іс-шарасы ұйымдастырылды. Тазалық жұмыстарына 50 мыңнан астам адам қатысып, 384,5 тонна қоқыс шығарылды.
Шараның негізгі мақсаты – арық-атыздар мен суару каналдарын қоқыстан тазарту, су арналарының кедергісіз ағып өтуін қамтамасыз ету және қоршаған ортаның тазалығын сақтау. Сонымен қатар бастама тұрғындардың экологиялық мәдениетін қалыптастыруға, елдімекендерді абаттандыруға және ұлттық құндылық саналатын асар дәстүрі арқылы бірлік пен ынтымақты нығайтуға бағытталды.
Экологиялық акцияға жалпы саны 50 283 адам қатысып, тазалық жұмыстарына 249 бірлік техника жұмылдырылды. Нәтижесінде 448,9 гектар аумақ тазартылып, 215,7 шақырым арық арнасы қоқыстан арылды. Сондай-ақ 1 150 ағаш отырғызылып, 6 206 ағаштың діңі әктелді.
Іс-шара барысында атқарылған жұмыстар елдімекендердің санитарлық жағдайын жақсартуға, қоршаған ортаны қорғауға және тұрғындардың табиғат алдындағы жауапкершілігін арттыруға мүмкіндік берді.
«Таза Қазақстан» акциясы аясында ұйымдастырылған «Асарлату» шарасы тұрғындарды ортақ іске жұмылдырып, тазалық мәдениетін қалыптастыруға, ұлттық дәстүрлерді дәріптеуге және қоғамдағы өзара ынтымақтастықты нығайтуға бағытталған маңызды бастама болды.
