19 наурызға белгіленген Парламент Мәжілісі мен барлық деңгейдегі мәслихаттар депутаттарының кезектен тыс сайлауы Түркістан облысында да қарқынды басталды. Дауыс берушілердің алғашқы легі таңғы сағат 7-ден сайлау учаскелеріне келе бастады. Өңірде қазір 941 сайлау учаскесі үздіксіз жұмыс істеп тұр. Олардың барлығында сайлаушылардың дауыс беруіне толық жағдай жасалған. Жалпы облыс бойынша тіркелген сайлаушылардың жалпы саны 1 млн 168 мыңнан асады.
Келес ауданында сайлаушылар белсенділік танытып жатыр. Соның бірі – №329 сайлау учаскесінде еліміздің әнұраны шырқалып, салтанатты түрде ашылды. Сағат 7:00-де бірінші келген 18 жастағы сайлаушыға комиссия төрағасы арнайы сыйлықтар табыстады.
18 жасқа толып, сайлау құқығына ие болған Ахилова Аяулым бұл мүмкіндікті қалт жібермей, өзінің азаматтық борышын абыроймен орындады.
Жалынды жасты тұңғыш рет дауыс беруге қатысып жатқанымен құттықтады. Сонымен қатар бата берген зейнеткер ақсақалға дәстүр бойынша иығына шапан жапты.
Түркістан облысының аудан, қалаларындағы тұрғындар да сайлауда өз таңдауларын жасап, белсенділік танытуда.
– Бүгін – халқымыз үшін айтулы күн. Бұл сайлаудан үлкен үміт, жақсылық күтеміз. Сайлау демократия талаптарына сай өтіп жатыр. Таңғы жетіден бастап жұмысқа кіріскен сайлау комиссиясының құрамы келушілерге қолайлы жағдай жасап, тұрақты мекенжайларына сәйкес қабылдау шараларын жүргізуде, – дейді жас сайлаушы.
Айта кету керек, өңірде таң азанымен айлау учаскелерінде дауыс беруге келген тұрғындардың қарасы көп. Ел басшысын анықтайтын шараға жергілікті тұрғындар белсенді түрде қатысып жатыр. Бұл күні сайлауға бірінші болып келіп, дауыс берген ауыл азаматтары, сондай-ақ алғаш рет сайлауға қатысқан азаматтарға сайлау комиссиясы тарапынан сый-сияпат көрсетілуде.
