Бүгін Түркістан қаласындағы «Достық үйінде» «Елдесу және татуласу» жобасы аясында Түркістан облыстық Қазақстан халқы Ассамблеясы Медиация кеңесінің кезекті отырысы өтті. Жиынға Түркістан облыстық ҚХА жанындағы Медиация кеңесінің төрағасы Бақытжан Бейсембаев модераторлық етті.
Келелі басқосуға Түркістан облыстық Қазақстан халқы Ассамблеясы жанындағы Медиация кеңесінің аудандық, қалалық төрағалары мен мүшелері қатысты.
Кеңес отырысына қатысушы спикерлер Түркістан облысы Қазақстан халқы Ассамблеясы жанындағы этномедиация кеңесінің сандық және сапалық құрамын жаңарту, жедел жұмыс жүргізуге қабілетті этномедиаторлар пулын қалыптастыру және кеңес төрағасының орынбасарын жастар өкілінен сайлау мәселесі, «Бейбітшілік және келісім» жобасы аясында Түркістан облысында атқарылған жұмыстар және «Елдесу және татуласу» жобасы аясында Түркістан облысында атқарылған жұмыстар жөнінде баяндады.
Жиында белгілі болғандай, өңірдегі медиаторлардың жүйелі жұмыстарының нәтижесінде биылғы жылдың басынан бері Түркістан облысында этнос өкілдерінің қатысуымен 62 құқықбұзушылық болса, соның 36-сы медиация тәртібімен тараптардың татуласуына қол жеткізілген. Ал 2023 жылы этнос өкілдерінің қатысуымен 192 құқық бұзушылық оқиға болған. Оның 151-і медиация жолымен шешімін тапқан.
– Еліміздегі медиация қызметін үйлестіру міндеті Қазақстан халқы Ассамблеясына жүктелгені белгілі. Қазақстан Республикасының Медиация туралы заңы 2011 жылы қабылданып, күшіне енген. Бұл құжат еліміздегі медиация саласындағы қоғамдық және азаматтық қатынастарды реттейді. Қазақ халқының тарихында да медиация институты ерекше орын алған. Біздің де бұл механизмді “бабалар мұрасы” деп атауға толық құқығымыз бар. Себебі Ұлы даламыздағы билер институтының қызметі, Тәуке ханнан мұра болып қалған “Жеті жарғының” да біраз баптары дәл осы медиация принциптеріне негізделген. Бүгінгі басқосуымыздың мақсаты – Этномедиация институтының қалыптастыруға қатысты Қазақстан Республикасы Президентінің тапсырмаларын, Қазақстан халқы Ассамблеясының республикалық этномедиация Кеңесінің кеңейтілген отырысындағы Хаттаманың орындалуы және Түркістан облыстық Қазақстан халқы Ассамблеясы Медиация кеңесінің құрамын жаңарту, – деді облыстық ҚХА жанындағы Медиация кеңесінің төрағасы Бақытжан Бейсембаев.
Күн тәртібіндегі мәселелер бойынша «Бейбітшілік және келісім» жобасы аясында Түркістан облысында атқарылған жұмыстар жөнінде Қазақстан халқы Ассамблеясы жанындағы этномедиация кеңесінің мүшесі, қоғамдық медиатор Мейірбек Өмірқұлов, «Елдесу және татуласу» жобасы аясында Түркістан облысында атқарылған жұмыстар жөнінде Қазақстан халқы Ассамблеясы жанындағы этномедиация кеңесінің мүшесі, кәсіби медиатор Жұлдыз Өтегенова баяндама жасады.
Жиын соңында қатысушылар өзара пікір алмасып, көкейкесті сауалдарына тұшымды жауаптар алды.
