Бүгін Мемлекет басшысы Түркістан облысының әкімі Өмірзақ Шөкеевті қабылдады. Қасым-Жомарт Тоқаевқа 2021 жылы Түркістан облысында атқарылған жұмыстар туралы есеп берілді.
Қабылдау барысында облыс әкімі «Халық үніне құлақ асатын мемлекет» тұжырымдамасына сәйкес, Сайрам ауданында жүзеге асырылған «Парасат» дискуссиялық клубы пилоттық жобасы туралы баяндады. Аталған жоба облыс, аудан, аймақтағы күштік құрылым басшыларының тұрғындармен кездесулерін, ашық әңгімелесулерін қамтамасыз етеді.
«Парасат» пікірталас клубынының негізгі мақсаты – қоғамдағы өзекті мәселелерді ашық айтып, пікірталас алаңында жан-жақты талқылау, шешу жолдарын қарастыру. Саяси партиялардың, үкіметтік емес ұйымдардың және мемлекеттік органдардың өкілдері арасында сындарлы диалогты қамтамасыз ету.
Қазіргі таңда «Парасат» пікірталас клубының құрамына сайрамдық ел ағалары, қоғам белсенділері, үкіметтік емес ұйымдардан, саяси партиялар мен БАҚ өкілдерінен, депутаттардан және жастар қауымынан 43 азамат енген. Сонымен қатар клуб отырыстарының күн тәртібіне сай жергілікті құқық қорғау органдарының басшылары да қатысып жүр.
Айта кетейік, ағымдағы жылдың 9 ақпан күні Түркістан облысы, Сайрам ауданы, Қарабұлақ ауылында «Парасат» пікірталас клубынының VI кезекті отырысы өтті. Күн тәртібінде жастар тәрбиесіндегі олқылықтарды шешу жолдары және Қарабұлақ ауылдық округіндегі өзекті мәселелер талқыланды. Жиынға Түркістан облысы әкімінің орынбасары Сәкен Қалқаманов арнайы қатысып, тақырыпқа қатысты ой-пікірін білдірді. Қоғамдық диалогты орнатуда осындай басқосулардың маңызды екеніне тоқталды. Сайрам ауданында бастау алған «Парасат» пікірталас клубының жұмысы үлгі ретінде алынып, кездесулер облыстағы барлық, аудан, қалаларда жалғасатындығын жеткізді. Енді «Парасат» пікірталас клубының келесі отырысында қаржы пирамидасы, жедел қаржы беру мекемелерінің заңсыз әрекеттері талқыланады.
Айта кетейік, Қасым-Жомарт Тоқаев қабылдау кезінде Түркістан облысында атқарылып жатқан жұмыстарға оң баға бере отырып, облыс әкіміне қолға алынған жобаларды жалғастыруды және халықпен тығыз жұмыс істеуді күшейтуді тапсырды.
