Елдік туын биікке көтерген, қасиетті қара домбыраның үнін ұғынған өрелі жұрттың – өнегелі ұрпағы бүгін тағы да асыл мұра қасиетті домбыраның үнін күмбірлетті.
Төлеби аудандық мәдениет үйінің ұйымдастыруымен Төлеби ауданының 90 жылдығына орай, аудандық «Күй – құдірет, күй – кие» атты күйшілер фестивалі аталып өтті. Іс-шара халқымыздың асыл мұраларының бір тармағы күй өнерін дамыту, халық арасында насихаттау, кеңінен таралуына ықпал ету, сондай-ақ күй өнерін дәріптеу, қазақ күйшілерінің есімдерін ел есінде қалдырып, асқақ шығармашылықтарын дәріптеп, жастарға насихаттау мақсатында ұйымдастырылды.
Ауданнан қатысқан 10 үміткер халық, қазақ композиторларының шығармаларын орындап, келген қонақтарды өз шеберліктерімен тәнті етті.
Бірінші Мамыр ауылдық мәдениет үйі атынан қатысқан Құлыбек Саят Созақ ауданында өтетін «Күй құдіреті» атты облыстық күйшілер байқауына жолдама алса, Жеңіс ауылдық мәдениет үйі атынан қатысқан Иманбеков Нұрмұхаммед «Бал таңдай» облыстық өнер фестивалінің «Күйшілер» байқауында ауданымыздың намысын қорғайтын болады.
Қатысушыларға ұйымдастыру алқасы және Түркістан облысының Қоғамдық даму басқармасы «Қоғамдық келісім» КММ-нің Төлеби аудандық филиалы атынан арнайы бағалы сыйлықтар табыс етілді.
