Бұл материалда Түркістан облысы тұрғындарының назарына ұсынылатын маңызды ақпараттар легі қозғалған. Ел көлемінде киберқауіпсіздік қызметі мәселелері жиі айтылып келеді. Жалпы айтқанда ақпараттық қауіпсіздік, облыс көлемінде маңызды мәселеге айналып үлгерген, оған себеп, ақпараттық қақтығыс заманында адамдардың интернет алаяқтығының құрбаны болып, олардың саны күн санап артуында. Осыған дейін Елімізде кибер полиция қызметі іске қосылады делінген болатын. Бұл туралы Ішкі істер министрі Марат Ахметжанов түркістандықтармен кездесуінде хабарлады.
Жаңа қызмет иелері IT технологияларды меңгерген кәсіби мамандардан жасақталады. Интернет алаяқтарға тап болған жәбірленушілерді тіркеп, ақшасын сақтап қалуға арналған шараларды сол жерде қабылдайды. Банктік есепшотын бұғаттауға көмек береді.
«Еуропа кеңесінің компьютерлік қылмыстар туралы конвенциясына ұсыныс бердік. Бізді күзге жақын қабылдайын деп жатыр. Онда мүше 66 ел бар. Соның баршасы да бізге құқықтық көмек береді. Бірлесіп тергеу амалдарын жүргізіп, алаяқтықтың жолын кесеміз», – деді Марат Ахметжанов.
Кездесуде министр еліміздегі интернет алаяқтықтың 5 есе өскенін айтып өтті. Осы жылдың басынан бері бұл бағытта 8000 қылмыс тіркелген. Түркістан облысында 5 ай ішінде 149 интернет алаяқтық қылмысы болғаны анықталды.
«Технологиялар мен онлайн қызметтердің дамуына байланысты алаяқтар мүмкіндіктерді пайдаланып, халықтың атынан несие алып жатыр. Халықтың жинаған қаражатын жаратуда. Қазір алаяқтар шетелдік нөмірмен телефон соғады. Бұрын қазақстандық нөмірмен байланысатын еді. Біз зерттедік. Операторлармен меморандум жасап, жалған номерлерді бұғаттадық. Осылайша 5 айдың ішінде 18 жарым миллион Қазақстан азаматын жалған телефон қоңырауынан сақтап қалдық», – деді министр.
