Түркістан облысында 2022 жылдың 5 айының қорытындысы бойынша жалпы өлім-жітім көрсеткіші өткен жылға қарағанда 10%-ға төмендеп отыр. Сондай-ақ, ағымдағы жылдың 6 айында облыста ана өлім-жітімі тіркелмеген. Бұл туралы бүгін брифингте ҚР Денсаулық сақтау министрі Ажар Ғиният мәлімдеді.
«Мемлекет басшысының тапсырмасын іске асыру шеңберінде халықаралық стандарттарға сәйкес келетін 8 перзентхана салу, соның ішінде Түркістан облысының Сарыағаш және Ордабасы аудандарында 2 перзентхана салу жоспарлануда. Түркістан облысында 6 мың штаттық бірлік бар, соның ішінде 4,5 мыңы практик дәрігерлер. Дәрігер кадрлардың тапшылығы өңірде 290 штаттық бірлікті құрайды. 2021 жылы еліміздің аймақтарына медициналық жоғары оқу орындарының 3 050 түлегі жолдам алды. Оның ішінде Түркістан облысына – 180 қызметкер келсе, биыл 170 түлекті жіберу жоспарлануда», – деді Ажар Ғиният.
Медицина қызметкерлерінің жалақысын орташа жалақыдан 2 есе көтеру жұмысы жүргізілуде. 2023 жылға қарай дәрігерлердің орташа жалақысы 531 мың теңгені, ал орта медицина қызметкерлерінің орташа жалақысы 250 мың теңгені құрайтын болады. Отандық денсаулық сақтаудың басым міндеттерінің бірі – еліміздің халқын дәрі-дәрмекпен үздіксіз қамтамасыз ету. Түркістан облысында амбулаториялық дәрілік қамтамасыз ету шеңберінде дәрілік заттар 11,6 млрд. теңгеден астам сомаға, ал стационарлық көмек үшін 6,7 млрд. теңгеден астам сомаға сатып алынған.
