Нұр-Сұлтан қаласындағы “Қазмедиа” орталығында Қазақстан Республикасы Мәдениет және спорт министрлігінің Мәдениет және архив салаларына арналған кеңейтілген алқа отырысы өтті. Алқалы жиынға аталған ведомства басшысы Дәурен Абаев және еліміздің барлық өңіріндегі мәдениет басқармаларының басшылары қатысты.
Алқа отырысы барысында мәдениет, архив және баспа ісі салаларында 2021 жылы атқарған қызметі мен 2022 жылға қойылған негізгі міндеттер талқыланды.
Министрліктің биылғы алқа мәжілісі мәдениет және архив ісі салалары бойынша, сондай-ақ, спорт және туризм салалары бойынша жеке-жеке өткенін айта кету керек.
Бүгінгі алқа мәжілісі мәдениет, архив ісі және кітап басып шығару мәселелері бойынша өтті. Алқалы жиында Түркістан облыстық мәдениет басқармасының басшысы Әзімхан Қойлыбаев өткен жылы атқарған жұмыстары туралы есеп беріп, 2022 жылға арналған жоспарлар туралы баяндама жасады.
“Есепті жылы облысымыз бірқатар маңызды мәдени ғимараттармен толықты. Атап айтар болсақ, «Ұлы Дала Елі» орталығы, Түркістан музыкалық драма театры, «Фараб» кітапханасы, Сұлтанбек Қожанов атындағы музейдің жаңа ғимараты, 2 ауылдық мәдениет үйі пайдалануға беріліп, Сайрам ауданында алтын құрсақты аналарға арналған «Ардақты Ана» музейі ашылды.
Мәдени инфрақұрылымды дамыту мақсатында облысымызда ағымдағы жылы «Ауыл ел – бесігі» бағдарламасы аясында 8 ауылдық мәдениет үйі мен клубтың құрылыс жұмыстары басталады деп күтілуде”,- деді Әзімхан Серікұлы.
Қазіргі таңда Түркістан облысында 685 мәдениет және өнер мекемесі халыққа қызмет көрсетіп келеді. Оның iшiнде 395 кiтапхана, 250 клуб мекемелері, 25 музей, 3 кәсіби театр, 2 орталық, 1 облыстық филармония, 1 «Конгресс Холл» көпсалалы кешені мен 1 көркемсурет галереясы, «Оңтүстікфильм» мекемесі, 6 саябақ бар.
Айта кетейік, өткен жылы Түркістан облысында 4 халықаралық, 5 республикалық, 19 облыстық деңгейдегі, жалпы клуб мекемелерінде 11338, кітапханаларда 15739, музейлерде 614 көпшілік іс-шара өткізілген.
Өткізілген іс-шаралардың басым көпшілігі ел Тәуелсіздігінің 30 жылдық мерекесіне арналған.
Алқа отырысының қорытындысына сай Түркістан облысының мәдениет саласында атқарылған жұмыстары министрлік тарапынан оң бағаланып, жаңа мақсат – міндеттер жүктелді.
