Биыл Республика күні қарсаңында Түркістан өңірінде 7430 орынға арналған 7 жаңа мектеп пен спорт кешені ел игілігіне беріледі. Бұл туралы облыстық қоғамдық даму басқармасының басшысы Аңсар Өсербаев мәлім етті.
Басқарма басшысының айтуынша, биыл облыста Республика күнін атап өтуде елдік пен бірлікті дәріптейтін қайырымдылық, экологиялық және патриоттық акцияларға басымдық беріліп отыр. Бұл ретте, ұлттық мерекенің тұжырымдамасы негізінде Түркістан облысында 30 іс-шарадан тұратын жоспар бекітілген.
Мереке аясында аудан, қалаларда өтетін 1200-ден астам шара өтіп жатыр. Оның қатарындасалтанатты жиындар, концерттік бағдарлама, театрландырылған қойылым, дөңгелек үстел, кітапхана көрмелері мен музейлерде экскурсия, спорттық шаралар т.б. ауқымды шаралар бар.
– Республика күнін мерекелеудің тағы бір ерекшелігі, «Таза табиғат» атауымен жаппай экологиялық науқан өткізуді дәстүрге айналдыру. Бұл өскелең ұрпақты қоршаған ортаға ұқыпты қарап, экологиялық тәрбиеге ықпал етеді. Сонымен бірге мерекенің бүкіл халықтық атмосферасын қалыптастыру және халықтың барлық нысаналы топтарын қатыстыру мақсатында орталық алаңдарда, саябақтар мен скверлерде жаппай серуендер ұйымдастырылады, – деді Аңсар Жаңабайұлы.
Бұдан бөлек облыс орталығында 240 отбасылық тұрғын үй кезекте тұрған азаматтарға беріледі. Қазығұрт ауданында электрлік желілері іске қосылса, Бәйдібек пен Түлкібас аудандарында аллеялар ашылады. Ал Сарыағаш және Ордабасы аудандарының бірқатар ауылы таза ауыз су мен табиғи газға қосылады деп жоспарланып отыр. Мұның барлығы мерекенің маңызын арттыруға бағытталған.
Айта кетсек, 19-20 қазан күндері Түркістанда халықаралық «Voice of Turan» қазақ әндері байқауы өтті. Оған 15 мемлекеттен 18-35 жас аралығындағы эстрадалық жанрдағы ең үздік орындаушылар қатысты.
