Елімізде Мемлекет басшысының тапсырмасымен «Таза Қазақстан» республикалық экологиялық акциясы өтіп жатыр. Бес апта бойы өтетін шараға Түркістан облысының тәртіп сақшылары да белсенділік танытып, өз үлестерін қосуда. Мәселен, Полиция департаментінің және оның қалалық, аудандық құрылымдарының жеке құрамы сенбілік өткізіп, өз аумақтарында тазалау-абаттандыру жұмыстарын жүргізді. Бұл жайында Түркістан облыстық Полиция департаментінің Жергілікті полиция қызметі басқармасы бастығының орынбасары Бегімхан Ахметов брифингте мәлімдеді.
«Облыс аумағында абаттандыру қағидаларын бұзу мен қоғамдық орындарды ластау фактілерін анықтау үшін 8 сәуір – 15 маусым аралығында «Тазалық» рейдтік шарасы өтеді. Күні бүгінге дейін жалпы 3 164 әкімшілік құқық бұзушылық туралы хаттама рәсімделді. Оның ішінде саябақтарды, скверлердi ластап, белгiленбеген орындарға коммуналдық қалдықтарды тастағаны үшін – 1 272 әкімшілік құқық бұзушылық анықталды. Сондай-ақ, қалалар мен елдi мекендердегі абаттандыру қағидаларын және инфрақұрылым объектілерін бұзу, жасыл желектерді жою және бүлдіру бойынша – 823 әкімшілік құқық бұзушылық анықталған»- деді басқарма басшысының орынбасары.
