Жуырда волейболдан қыздар арасында Түркістан облысының IV Спартакиадасы аяқталды. Аса тартысты өткен жарыс Арыс қаласында ұйымдастырылды.
Волейболшы қыздар додасына жалпы аудан, қалалардан 9 команда қатысты. Спартакиадада топ жарған үздіктер де анықталды. Бас жүлдені Шардара ауданының қыздар командасы жеңіп алса, күміс жүлдегер Отырар ауданы құрамасы атанды. Ал, қола жүлдені Бәйдібек ауданының спортшылары иеленді. Үздіктер қатарында Түркістан құрамасы да төрттікке енді.
Сонымен, аса тартысты өткен волейбол жарысында өз таланттарымен танылған “Үздік ойыншы” номинациясын бәйдібектік спортшы қыз Ержанқызы Жұлдыз бен Түркістан қаласының үмітін ақтаған жерлесіміз Айдарова Индира атанды. Бұдан өзге шаршы алаңда жасындай жарқылдаған “Үздік шабуылшы” атанған отырарлық Тұрғанбаева Ақниет пен шардаралық Амирбекова Айгүл үздіктер қатарынан табылды. Шаршы алаңда жеңіске жеткен әрі волейбол жарысында өзінің шеберліктерін көрсеткен Отырар ауданынан келген жас спортшы Тінейбекова Гүлдерай мен шағалалы Шардара ауданының үміті Әбибулла Балнұр үздік қорғаушы атанды. Сонымен қатар, үздік байланыстырушылар деп шардаралық Ермек Айкерім мен Бәйдібек ауданы құрамасында өнер көрсеткен Ғалымжанқызы Айдана атанса, “Үздік үйлестіруші” түркістандық дарынды спортшы қыз Мұсаева Гүлжанға бұйырды.
