Ассамблеяның 30 жылдығы – егемен еліміздің тарихындағы айтулы оқиға. Аталған институт этносаралық келісім мен жалпыұлттық бірлікті нығайту жолында тиімді саясат жүргізе алатын ұйым ретінде танылды. Осы орайда, Ассамблеяның 30 жылдығы аясында Түркістан облысында атқарылып жатқан жұмыстарды баяндаймыз. Соңғы жылдары Түркістан облысында медиация саласы айтарлықтай көрсеткіштерге жеткенін айта кеткен жөн. Былтыр Ассамблея сессиясында Президентіміз облысымыздағы этномедиацияға қатысты жұмыстарға оң баға берді. Биыл Ассамблеяның 30 жылдығы аясында өңірімізде 2 мыңнан аса ұлттық, мәдени, спорттық іс-шаралар өткізілуде. «Ассамблея жастары» да азаматтық жауапкершілікті дамытуға арналған бірқатар бағдарламалар мен жобаларды жүзеге асыруда. Облысымыздағы этнос өкілдері тығыз шоғырланған аудандардан «Достық үйі» ашылмақ. Түркістан облысында этносаралық келісім тұрақты дамып, барлық азаматтардың мүдделері тең дәрежеде қорғалады.
Мемлекет басшысы Қасым-Жомарт Кемелұлы Тоқаев Қазақстан халқы Ассамблеясының ХХХІV сессиясында еліміздің рухани және тарихи-мәдени ордасы – Түркістанда ашылған жаңа «Достық үйін» үлгі етті. Осындай «Достық үйлерін» еліміздегі бірнеше қала мен аудандарда ашуды тапсырды. Оның ішінде өзіміздің Сайрам ауданы да бар. Түркістан қаласындағы «Достық үйі» ғимаратында өткен Түркістан облыстық Қазақстан халқы Ассамблеясы Кеңесінің отырысында Түркістан облысының әкімі Нұралхан Көшеровтың сөзінше облыстағы этнос өкілдері тығыз шоғырланған Сарыағаш ауданынан да «Достық үйін» ашу керек.
Қазақстан халқы Ассамблеясы 1995 жылдың 1 наурызында құрылды. Бүгінде бұл ұйым этносаралық келісім мен татулықтың символына айналды. ҚХА түрлі бастамалар мен жобаларды жүзеге асырып, қазақ жеріндегі халықтардың үйлесімді өмір сүруіне ықпал етуде. Ассамблея түрлі бастамалар мен бағдарламаларды жүзеге асырып, қазақ жеріндегі халықтардың үйлесімді өмір сүруіне айтарлықтай үлес қосты. Оның қызметі Қазақстанның көпұлтты әрі көпмәдениетті қоғамын дамытуда үлкен маңызға ие. 30 жыл ішінде Ассамблеяның бастамасымен көптеген маңызды жобалар жүзеге асырылып, этносаралық татулықты нығайтуға бағытталған іс-шаралар өткізілді. Бұл мерейтой – Қазақстан халқының бірлігі мен ынтымағын айшықтайтын маңызды белес. Бүгінгі таңда түрлі ұлттар мен ұлыстардың өкілдері елдің болашағы үшін бірлесе еңбек етуде. Қазақстан халқы Ассамблеясының 30 жылдығы – ұлтаралық қатынастардың берік іргетасын нығайтып, еліміздің толеранттылық пен келісімнің орталығы ретінде дамуына серпін беретін үлкен қадам.
Ассамблеяның басты мақсаты – мемлекеттік ұлттық саясатты жүзеге асыру, барлық этностық және діни топтардың өкілдеріне тең құқықтар мен қолайлы жағдай жасау. Бұл саясаттың арқасында Қазақстанда этникалық немесе діни сипаттағы қақтығыстар орын алған жоқ. Тәуелсіз Қазақстанның алғашқы заңнамалық құжаттары барлық азаматтардың тең құқығы мен бостандығын қамтамасыз ететін құқықтық базаны қалыптастырды. Бұл заңдар ел халқының этностық және діни ерекшеліктеріне қарамастан, олардың азаматтық және саяси құқықтарын бекітті. Қазақстанның этносаралық келісім саласындағы саясаты халықаралық деңгейде жоғары бағаланып, көпұлтты елдер тарапынан үлкен қызығушылық тудырды.Халықаралық қауымдастық Қазақстанды түрлі ұлт өкілдері арасындағы толеранттылықты, конфессияаралық және мәдениетаралық келісімді қамтамасыз ететін мемлекет ретінде таниды. Сонымен қатар, еліміз бәсекеге қабілетті, зайырлы мемлекет ретінде өзіндік даму моделін қалыптастырды. Қазақстан өркениеттер арасындағы диалогты кеңейту мен нығайтуға әрдайым мүдделі екенін көрсетіп келеді және жаһандық қауымдастықпен ашық байланыс орнатуға дайын екенін дәлелдеді.
Тәуелсіздіктің алғашқы жылдарында еліміздің рухани өмірі, әлеуметтік әл-ауқаты және ұлттық мәдениетінің жаңғыруы секілді маңызды үдерістер жүрді. Қазақстан – ТМД елдері арасында Қазақстан халқы Ассамблеясы сынды бірегей ұйымы бар алғашқы мемлекет. Бұл институттың құрылуы көпэтносты қоғамның қазақстандық үлгісін бекітуге және ұлтаралық келісімді нығайтуға айтарлықтай үлес қосты.Ассамблея құрылған күннен бастап елдегі бейбітшілік пен тұрақтылықты сақтауда маңызды рөл атқарды. Соңғы жылдары оның қоғамдағы орны бұрынғыдан да айқындала түсті. Бүгінде Ассамблея мүшелері саяси, экономикалық, әлеуметтік және жастар саясаты салаларында белсенділік танытып келеді. Барлығын ортақ мақсат – Қазақстанның өркендеуі мен болашағы толғандырады.
