Бүгін – елімізде айтулы күн. Яғни ҚР Мәжілісі және әртүрлі деңгейлі мәслихат депутаттарының кезектен тыс сайлауы өтіп жатыр. Таңғы сағат 07:00-де сайлау учаскелерінің жұмысы басталған сәттен облыстық мәдениет басқармасы басшысы Әзімхан Қойлыбаев пен мәдениет саласының қызметкерлері өз таңдауын жасап, белсенділік танытуда.
Сондай-ақ, мемлекет басшысының биылғы Қазақстан халқына жолдауын насихаттау мақсатында Сауран ауданының кітапханашыларының ұйымдастыруымен сайлаушыларға «Жаңа Қазақстан: Жаңару мен жаңғыру жолы» атты көрме таныстырылды.
Одан бөлек, сайлау учаскілерінде тұрғындарға арналып Ұлыстың ұлы күніндегі басты тағам – Наурыз көже мен бауырсақтар ұсынылды.
Ал Түлкібаста шабандоздар мен өңір қариялары ел ертеңі мен болашағы үшін өз дауыстарын берді.
Айта кетейік, кешкі сағат 20:00-де дауыс беру тоқтатылып, бюллетендерді санау басталады. Бүгінгі сайлауға Түркістан облысы бойынша 1131 кандидат қатысып жатыр. Ал тіркелген сайлаушылардың жалпы саны – 1 млн 168 мың 658.
