Түркістан облысындағы 911 мемлекеттік мектептің барлығы интернет желісімен қамтылған. Оның ішінде 581 мектепке талшықты-оптикалық байланыс желісі арқылы жылдамдығы 20-80 Мбит/с аралығындағы интернет желісі орнатылған. Ал, тағы 33 мектеп жуырда оптикамен қамтылады. Бұдан бөлек, 330 мектеп шалғай және таулы аумақтарда орналасуына байланысты, техникалық мүмкіндігіне қарай жылдамдығы 512 Кб/с – 20 Мбит/с құрайтын төмен жылдамдықты интернет желісімен қамтылған. Бүгінде аталған білім ұяларының 200-ден астамы Илон Масктың Starlink спутниктік интернетіне қосылды. Қалған ауылдар сәуір айының соңында жаңа желімен жұмыс жасауды бастайды.
Түркістан облысының цифрландыру, мемлекеттік қызметтер көрсету және архивтер басқармасы басшысының міндетін атқарушы Дәулет Жасардың сөзінше өткен жылы «Транстелеком» АҚ-на қарасты қызмет көрсетуші компаниялармен 25 400 тұрғын үй шаруашылықтары үй жағдайындағы интернет желісімен қамтылып, алдыңғы жылмен салыстырғанда 3834-ке артқан. Дегенмен, тұрғындардың басым көпшілігі радиокөпір технологиясы арқылы интернет желісіне қосылуына байланысты интернет сапасында олқылық анықталған. Осы мәселені реттеу, талапқа сай технологияларды қолдану жөнінде ұсыныс берілді. Сонымен бірге мектептердегі интернет жылдамдығын жақсарту жолдары, демалыс орындары мен туристер көп шоғырланған аумақтарда жалпы қолданысқа ие Free Wi-Fi қызметіндегі анықталған кемшіліктер де айтылды. Қос тарап облыста интернет жылдамдығын арттыру және әріптестікті нығайту жөнінде уағдаласты.
Сонымен қатар, Түркістан облысы бойынша аудан-қалаларда және елді мекендерде әр саланы дамыту бойынша «Аймақтық кешенді схема» әзірленген. Сондай-ақ, ҚР Президентінің «Инженерлік желілер туралы деректерді толық цифрландыруды қамтамасыз ету» жөніндегі тапсырмасы аясында облыстағы 32 106,64 га құрылыс салынған аумақ көлемі анықталды. Оның ішінде 20 696,40 га аумаққа түгендеу жұмыстарын әзірлеу қажет. Биыл 12 920,4 гектар аумаққа түгендеу жұмыстары жүргізілу жоспарланып, қазіргі таңда 12 123,25 гектары орындалды.
