Түркістан облысы Сауран ауданы Оранғай ауылдық округінде қуаты 300 МВт болатын ірі күн электр станциясының құрылысы ресми түрде басталып, уақыт капсуласын салу рәсімі өтті. Аталған жоба – өңірдегі жаңартылатын энергия көздерін дамытуға бағытталған ең ауқымды бастамалардың бірі. Бұл жоба тек жаңартылатын энергия көздерін дамытуға ғана емес, сонымен қатар жергілікті халыққа жаңа жұмыс орындарын құруға, инфрақұрылымды жетілдіруге және әлеуметтік-экономикалық дамуды жеделдетуге арналған кешенді бастама болып табылады. Күн электр станциясының іске қосылуы аймақтың энергетикалық әлеуетін арттырып, жасыл энергетика үлесін ұлғайтуға, сондай-ақ жаңа жұмыс орындарын ашуға мүмкіндік береді.
Салтанатты жиында Түркістан облысының әкімі Нұралхан Көшеров құттықтау сөз сөйлеп, жобаның өңір үшін стратегиялық маңызын атап өтті. Оның айтуынша, бұл бастама облыс экономикасының әртараптануына, инвестициялық тартымдылықтың артуына және экологиялық таза энергия өндіруге жол ашады.
– Бүгін өңіріміздің ғана емес, бүкіл еліміздің энергетикалық қауіпсіздігі мен «жасыл экономикаға» көшу жолындағы маңызды жобалардың бірі – қуаты 300 МВт болатын күн электр станциясының іргетасын қалау рәсіміне жиналып отырмыз. Түркістан облысы – ауа температурасы ең жоғары аймақтардың бірі. Сондықтан жаңартылатын энергия жобаларын дамыту, күн қуатын пайдалану – өңіріміз үшін аса тиімді әрі болашағы бар бағыт. Аталған жобаны жүзеге асыру үшін құйылатын инвестиция құны шамамен 160 млрд. теңгені құрайды. Жоба аясында 500-ге жуық жұмыс орны ашылады деп көзделуде және жергілікті тұрғындар жұмыспен қамтамасыз етіледі. Бүгінгі бастама – экологиялық таза, тұрақты даму жолына түскен Түркістанның болашағына салынған инвестиция. Бұл жоба облысымыздың энергия инфрақұрылымын нығайтып қана қоймай, халықаралық инвесторлар үшін өңірдің тартымдылығын арттыра түседі. Осы жобаны жүзеге асыруға қолдау көрсеткен Қазақстан Республикасының Президентіне, Үкіметіне, барлық министрліктер мен мекемелерге, сондай-ақ серіктес компания «Energy China» басшылығына алғыс айтқым келеді. Ынтымақ пен сенімге негізделген серіктестігіміз алдағы уақытта да табысты жалғаса беретініне сенімдімін. Бүгінгі салтанатты рәсім – үлкен жұмыстың бастамасы. Жобаның табысты жүзеге асуына тілектеспін, – деді Нұралхан Көшеров.
Бейнебайланыс арқылы сөйлеген «Самұрық-Қазына» ұлттық әл-ауқат қоры» АҚ Басқарма төрағасы Нұрлан Жақыпов қор тарапынан жаңартылатын энергия жобаларына жүйелі қолдау көрсетіліп келе жатқанын айтып, 300 МВт-тық күн электр станциясы Қазақстанның энергетикалық қауіпсіздігін нығайтуға елеулі үлес қосатынын жеткізді.
Қытай Халық Республикасының Қазақстандағы Төтенше және Өкілетті Елшісі Хань Чуньлинь бұл жобаны Қазақстан мен Қытай арасындағы стратегиялық серіктестіктің жарқын үлгісі ретінде атап, жасыл энергетика саласындағы бірлескен бастамалардың маңызына тоқталды. Сонымен қатар бейнебайланыс «China Energy Group» президенті Ни Чжэн сөз сөйлеп, жобаның ұлттық энергетика саласы үшін мәні мен халықаралық әріптестікті дамытудағы рөлін атап өтті.
Жиында «Самұрық-Энерго» АҚ Басқарма төрағасы Қайрат Мақсұтов жоба компанияның төмен көміртекті генерацияға және заманауи энергия жүйесін дамытуға кезең-кезеңмен көшу жөніндегі стратегиясының маңызды бөлігі екенін атап өтті: «Самұрық – Энерго» үшін бұл станцияны салу – инвестициялық жоба ғана емес, сонымен қатар еліміздің ұзақ мерзімді орнықты дамуына қосқан үлесі. Біз серіктестерімізбен бірлесе отырып, объектіні ең жоғары сапа мен сенімділік стандарттарына сәйкес іске асыра алатынымызға сенімдіміз», деді.
«China Energy Engineering Overseas Investment Company» директорлар кеңесінің төрағасы Линь Сяодань жобаның техникалық, экологиялық және инвестициялық қырларына тоқталып, оны сапалы әрі белгіленген мерзімде іске асыруға дайын екендерін мәлімдеді. Капсуланы салу құрметі Түркістан облысының әкімі Нұралхан Көшеровке, «Самұрық-Энерго» АҚ Басқарма төрағасы Қайрат Мақсұтовқа және «China Energy Engineering Overseas Investment Company» директорлар кеңесінің төрағасы Линь Сяоданьға берілді.
Аталған күн электр станциясы толық іске қосылғаннан кейін Түркістан облысында жаңартылатын энергия көздерінің үлесі артады. Сонымен бірге инвестиция тартуға, зауыттар ашуға қажетті энергия көзі молайып, өңірдің тұрақты әрі экологиялық қауіпсіз дамуына серпін береді.
Қазақстан Президенті Қасым-Жомарт Тоқаев өз Жолдауларында жаңартылатын энергия көздерін дамытуға ерекше мән берген. «Энергетикалық қауіпсіздік пен экологиялық тұрақтылық – елдің тұрақты дамуының басты факторлары», – деген сөздері жобаның стратегиялық бағытын нақтылай түседі. Сонымен қатар, Тоқаев Жолдауларында өңірлердің экономикалық дамуы үшін инвестиция тарту, инновациялық жобаларды қолдау және халықтың өмір сапасын арттырудың маңыздылығы көрсетілген. Осының аясында Сауран ауданына салынатын 300 МВт күн электр станциясы – Президент Жолдауларын іске асырудың нақты мысалы болып табылады.
Энергетикалық жобаның әлеуметтік мәні де айтарлықтай. Құрылыс және кейіннен эксплуатация кезеңінде жүздеген жаңа жұмыс орындары пайда болады. Бұл ауыл тұрғындарын, аймақ мамандарын және жас мамандарды жұмыспен қамтамасыз етуге, олардың кәсіби біліктілігін арттыруға мүмкіндік береді. Мемлекет басшысы Тоқаев өз Жолдауында: «Әрбір инвестициялық жоба жергілікті халыққа нақты пайда әкелуі тиіс» деп атап көрсеткен болатын. Күн электр станциясы тұрғындарға тұрақты табыс көзі мен әлеуметтік тұрақтылық әкелетін маңызды экономикалық бастамаға айналады.
Экономикалық тұрғыдан алғанда, бұл жоба өңірдің энергетикалық әлеуетін арттырады, электр энергиясын тұрақты өндіру арқылы өндіріс саласын дамытуға және индустриялық инфрақұрылымды кеңейтуге мүмкіндік береді. Жобаның іске асырылуы аймақтық және ұлттық экономика үшін тұрақты энергия көздерін қамтамасыз етуге, электр энергиясының экспорттық әлеуетін арттыруға ықпал етеді. Тоқаев Жолдауларында «Қазақстанның энергетикалық жүйесін жаңартылатын энергия көздерімен толықтыру, экологиялық таза өндіріс технологияларын енгізу арқылы экономикамыздың бәсекеге қабілеттілігін арттыру маңызды» деп көрсетілген.
Жобаның экологиялық аспектісі де аса маңызды. Күн электр станциясы дәстүрлі энергия көздеріне тәуелділікті азайтып, көміртегі шығарындыларын төмендетуге мүмкіндік береді. Бұл өңірдің экологиялық тұрақтылығын арттырып қана қоймай, жастар мен тұрғындарға таза ортада өмір сүру жағдайын қамтамасыз етеді. Президент Тоқаев Жолдауында: «Жаңартылатын энергия көздерін дамыту арқылы экологиялық тепе-теңдікті сақтау – ұлттық міндетіміз» деген болатын.
Инфрақұрылымдық және әлеуметтік дамуға қосқан үлесі де елеулі. Жобаны іске асыру барысында жолдар, көлік жүйелері, техникалық және логистикалық инфрақұрылым дамиды. Бұл аймақтың экономикалық белсенділігін арттырып, шағын және орта бизнеске жаңа мүмкіндіктер ашады. Сонымен қатар, жобамен байланысты білім беру және ғылыми зерттеу бағыттары да дамиды, жастарды энергетика саласына тарту, жаңа мамандарды дайындау мүмкіндігі пайда болады. Мемлекет басшысы Тоқаев өз Жолдауында инновациялық жобаларды іске асыру арқылы жастардың біліктілігін арттыру мен жаңа мамандықтарды дамыту маңызды екенін атап көрсеткен.
Сондай-ақ, күн электр станциясы өңірдің халықаралық инвестициялық тартымдылығын арттырады. Жобаны шетелдік инвесторлар қолдап, Қазақстан мен халықаралық серіктестер арасындағы ынтымақтастықты нығайтуға мүмкіндік береді. Бұл экономикалық өсімге, технологиялық трансфертке, экспорттық әлеуеттің артуына және өңірлік бәсекеге қабілеттіліктің жақсаруына ықпал етеді. Президент Тоқаев Жолдауларында халықаралық инвестицияларды тарту арқылы өңірлік дамуды жеделдету қажеттігі атап көрсетілген.
