Отырар ауданы тұрғындарымен кездесуге келген Түркістан облысының әкімі Өмірзақ Шөкеевке ауыл тұрғыны балалық шағында ата – анасымен бірге түскен суретін сыйлады. Ол осылайша әке аманатын орындағанын айтты.
Жаңа форматта, ашық аспан астында өткен кездесу кезінде аудан тұрғындары өңір басшысымен тілдесіп, сауалдарын қойды. Отырардың өзекті мәселелерін жақсы білетінін айтқан облыс әкімі тұрғындардың барлық сұрақтарына жауап берді.
— Бүгін өздеріңізбен жүздесіп, аудандағы көкейкесті мәселелерді бірге талқылап, оның шешу жолдарын қарастыру үшін кездесуге келіп отырмын. Заман талабына сай әлеуметтік бағдары бар нарықтық экономиканы құру және дамыту бағытындағы жұмыстар жалғасады. Шағын бизнестен көп үміт күтеміз. Облысымыздың халқы өте еңбекқор. Соның нәтижесінде шағын кәсіпкерлік бойынша көш басында келеміз. Өңірімізде жеке кәсіпкерлерді қолдауға күш салынады. Әрине бизнес бастау оңай шаруа емес. Креативті экономика деген бар. Жоқ жерден, ойламаған жерден кәсіп түрлері ашылып жатыр. Өңірде шағын кәсіпкерлер саны артып келеді. Осы бағыттан таймауымыз керек, — деді облыс әкімі.
Сонымен бірге облыс әкімі Өмірзақ Шөкеев аудан тұрғындарын жеке мәселелері бойынша қабылдап, ұсыныс-пікірлерін тыңдады. Түркістан-Отырар жолының құрылысы келесі жылы аяқталып, ауданда ардагерлерге арналған орталық ашылады.
Отырар ауданында шағын бизнес субъектілері саны артқан. Бизнес бастаудың қыр-сырымен бөліскен Түркістан облысының әкімі Өмірзақ Шөкеев мемлекеттік бағдарлама арқылы қаражат алып, кәсіп ашқан отырарлықтармен кездесті. Олар қымыз, көкөніс, көрпе – төсек, қыш құмыра, темір, тігін шеберханасы, керамика өнімдерін жасау, бөдене шаруашылығын дамытуды қолға алған. Облыс әкімі жаңа кәсіп ашқан азаматтардың ұсыныс – тілектерін тыңдап, істеріне сәттілік тіледі.
Отырар ауданы, Қоғам ауылына газ келді. Ұзындығы 25 шақырымнан асатын газ құбыры арқылы 2 мыңға жуық халық табиғи газбен қамтылатын болды. Сондай-ақ 29 тұрмыстық- коммуналдық нысандар толығымен газдандырылды.
Түркістан облысының әкімі Өмірзақ Шөкеев Отырар ауданына іссапарында аймақтың тыныс-тіршілігімен танысты.
2018 жылы Отырар ауданындағы елді мекендерді газдандыру бойынша жоспарлы жұмыстар басталып, бүгінгі таңда 7 елдімекен тұрғындары табиғи газбен қамтылды. Бүгінде 20-дан астам елді мекенде газ тарату жүйесі жүріп жатыр. Қарқынды жұмыстар нәтижесінде Отырар ауданының 70 пайызы газбен қамтылатын болады.
Жалпы биыл сәуір айында Отырар ауданының ауылдарына газ беріле бастады. Атап айтсақ, Отырар ауданы, Ынталы ауыл округінде табиғи газ жүйесі толықтай тексеруден өткізіліп, тұрғын үйге қосылды. Тұрғындардың көптен күткен бұл жағымды жаңалығына аудан әкімінің орынбасары Жансұлтан Сейітжанов пен аудандық тұрғын үй-коммуналдық шаруашылығы жолаушылар көлігі және автомобиль жолдары бөлімінің басшысы Асылхан Құдайбергендер арнайы барып, ауылдағы ағайынның бұл қуанышымен ортақтасқан еді. «Табиғи газ Ынталы және Мыңшұқыр елді мекендеріне келіп жетті. Енді бізге монтаждау жұмыстарын жүргізіп, құжаттарымызды толықтай дайындап, газ жүйесін тұрғын үйімізге қосу ғана қалып тұр. Президентіміздің ауылдық аймақтарды дамыту, әл-ауқатын жақсарту, сапалы ауыз сумен және табиғи газбен қамтамасыз ету жөніндегі тапсырмасына сәйкес бұл бағыттағы жұмыстар алдағы уақытта да жалғаса береді», – деген аудан әкімінің орынбасары Ж.Сейітжанов ауыл тұрғындарын құттықтап, игi тiлегiн бiлдiрдi. Қуаныштары қойнына сыймаған ауыл тұрғындары дән риза.
– Бүгін біздің ауыл үшін шаттыққа толы күн. Үйлерімізге газ кіргізіліп, көгілдір отынның игілігін көретін уақыт алыс емес. Қыс бойы үйімізді жылытуға кем дегенде 4-5 тонна көмір жағамыз. Биыл ауданда көмірдің әр тоннасы шамамен 17-18 мың теңгеден сатылды. Оған үйге жеткізіп беруіне тағы да қосымша ақы төлейміз. Көмір сатып алғаннан гөрі бізге газдың төлемі арзанырақ. Біздің қуанышымызда шек жоқ, – дейді ауыл тұрғындары.
Отырар ауданында 55 мыңға жуық халық тұрады. Өткен жылы өнеркәсіп өнімінің көлемі 15 млрд. теңгеге жеткен.
Инвестиция көлемі 17 млрд. теңгені құрап, 154%-ға артқан. Егіс көлемі 35 мың гектарға жеткен. 200 га жуық жерден бірінші өнім жинау күтілуде. 17 мың шаршы метр тұрғын үй берілді. «Ауыл – Ел бесігі» жобасы аясында ауылды жерлерге газ беріліп, Балтакөл елді мекенінде мәдениет үйі салынды. Маяқұм елді мекеніндегі мектеп күрделі жөндеуден өткізіліп,
Отырар елді мекеніндегі дәрігерлік амбулатория күрделі жөндеуден өткізілді. Биыл да жұмыстар жалғасады.
