Бүгін Елордада медицина қызметкерлері мерекесінің қарсанында “Дені сау ұлт” ұлттық медициналық саммиті өтті. Саммит аясында еліміздегі медициналық ұйымдар арасындағы “ALTYN SHIPAGER” ұлттық сыйлығының жеңімпаздары анықталды.
“ALTYN SHIPAGER” сыйлығының нұсқасы бойынша “Үздік көпбейінді облыстық аурухана” атағының иегері болып Түркістан облысының облыстық клиникалық ауруханасы атанды. Бұл өңірдің жетекші клиникасы, оның 27 – клиникалық бөлімшесі, 2 – анестезиология және реаниматология бөлімшесі, 5 – емхана, оның ішінде онкологиялық орталық және параклиникалық бөлімшелері бар.
Ал ең үздік босандыру ұйымы болып Түркістан облысының №1 облыстық перинаталдық орталығы жарияланды, ол тек өңірдің ғана емес, Қазақстанның да ірі перинаталдық орталықтарының бірі болып табылады. №1 ОПО-ның төсек-орын қоры 300-ді, штат саны 600-ден астам қызметкерді құрайды. Жыл сайын орталықта 10 мыңнан астам жаңа туған нәресте дүниеге келеді.
Сондай-ақ медициналық ұйымдар арасындағы үздік үштікке Түркістан облыстық балалар ауруханасы, Түркістан қалалық орталық ауруханасы, Кентау қаласындағы «Жансая» облыстық балалар оңалту орталығы шықты.
Саммитке ҚР Үкіметінің мүшелері, еліміздің медициналық қоғамдастығының өкілдері, бизнесмендер, Денсаулық сақтау саласының отандық және шетелдік сарапшылары қатысты.
Айта кетейік, ҚР Денсаулық сақтау министрлігі “ALTYN SHIPAGER” Ұлттық медициналық сыйлығының ұйымдастыру комитетімен бірлесіп, медицина қызметкерлері күнін мерекелеу аясында және Президенттің “Жаңа Қазақстан” идеясы аясында іске асырылатын іс-шараны ұйымдастырушы болып табылады.
Айта кетсек, бүгінде Түркістанда медицина салсының дамуына ерекше көңіл бөлініп жатыр. Қазіргі таңда облыс орталығында жаңа жедел жәрдем станциясы салынды. Түркістан облысының әкімдігі мен «Қазақстандық-Француздық «КАТКО» бірлескен кәсіпорны» ЖШС бой көтерген нысан 25 бригадаға арналған. Мұнда кардиологиялық, педиатриялық, реанимациялық-хирургиялық, неврологиялық, психиатриялық, токсикологиялық бригадалар болады. Орталықта ересектер мен балаларға тәулік бойы тегін жедел және шұғыл медициналық көмек көрсетіледі. Жедел жәрдем станциясы жылына 70 000 шақыруға шыға алады. Жобаның технологиялық бөлігі әкімшілік-тұрмыстық корпусты, орталық зарарсыздандыру бөлімшесі ғимараты мен кір жуатын орынды, 25 арнайы медициналық көлікке арналған гараж бен бақылау-өткізу пунктін қарастырады. Орталықтың технологиялық бөлігі оның қауіпсіздігі мен барлық нормативтік талаптардың орындалуын толығымен қамтамасыз етеді. Жедел жәрдем станциясының жалпы жер аумағы 2,2 гектарды құрайды.
Сондай-ақ Түркістан қаласында «Денсаулық» саябағы салынды. Саялы демалыс орнының 6240 шаршы метр жері – көгалды аумақ. Онда 540 дана ағаш егілген. 3150 шаршы метріне аяқжол төселген. 100 дана бастырма орналастырылып, балалар ойын алаңшасы мен стрит воркаут жасақталған. Одан бөлек, саябақ ішінде әсемдік үшін қойылған ана мен бала мүсіні және 136 дана кіші сәулеттік формалар да бар. Саябақ автотұрақпен де қамтамасыз етілген.
Қала әкімдігі тарапынан саябақтар, скверлер, гүлзарлар, көшелер мен жасыл аймақтар аумағын тазалау, жасыл желектерді егу және оны күтіп ұстау, шағын сәулеттік пішіндер мен ескерткіштерді, субұрқақтарды, суғару жүйелерін салу және қадағалау жұмыстары жүргізіліп келеді. Көгалдандыру жұмыстарына 700-ден астам адам тартылған.
