Дені саудың – жаны сау! Мемлекеттік қызметшінің салауатты өмір салтын ұстануы қоғамға үлгі болуы тиіс. Петропавл қаласында өтіп жатқан мемлекеттік қызметшілер арасындағы республикалық Спартакиадада Түркістан облысының бильярд құрама командасы командалық есеппен жүлделі 1 орынға ие болды.
Аталған спорт түрінен Ордабасы ауданы, Қажымұқан ауыл округінің әкімі Ендібай Құмар, Түркістан облысы бойынша Мемлекеттік кірістер департаментінің жетекші маманы Дастан Айтымбетов, Түркістан қаласы бойынша Мемлекеттік кірістер басқармасының басшысы Ермахан Атемов және Мемлекеттік сатып алу басқармасының басшысы Дастан Альтеев жарыс жүлделерімен марапатталды.
Петропавлда еліміздегі мемлекеттік қызметшілердің басын қосқан спартакиада 14 шілде күні бастау алды. Жалпы, мұндай республикалық деңгейдегі жарыс жыл сайын ұйымдастырылады. Биыл еліміздің әр өңірінен келген мемлекеттік қызметшілер Қызылжар төрінде алғаш рет бас қосуда. Сондықтан, жергілікті өнерпаздар алыстан келген қонақтарға концерттік бағдарлама ұсынды.
Футбол, волейбол, үстел теннисі, жүзу, тоғызқұмалақ және қазақ күресі. Дәл осы спорт түрлерінен еліміздің түкпір-түкпірінен келген мемелекеттік қызметшілер сынға түспек.
Айта кетерлігі, Түркістан облысының волейбол құрама командасы 16 шілде күні өтетін ақтық ойынға жолдама алды. Дүбірлі сайысқа еліміздің 16 облысынан келген 700-ге жуық мемлекеттік қызметші қатысуда.Спорттың 7 түрінен сынға түсетін мемлекеттік қызметшілер арасындағы спартакиада жексенбі күні өз мәресіне жетпек. Дәл сол күні жарыстың жеңімпаздары анықталады.
