Қазанның 13-14 күндері Қостанай облысы, Тобыл қаласында елімізге белгілі сатирик-жазушы, этнограф-ғалым Сейіт Кенжеахметов атындағы «Мірдің оғы» ІІІ республикалық әзіл-сықақ театрлары арасында байқау-фестивалі өтті. Аталған байқауға Түркістан облысы, Келес ауданының «Күлкі терапиясы» әзіл-сықақ театры қатысып, жүлделі І орынға ие болды.
Байқау-фестивальдің мақсаты – Сейіт Кенжеахметовтың шығармашылық мұрасымен танысу, әзіл-сықақ театрларының орындаушылық шеберлігін шыңдау, еліміздің талантты өнерпаздарын анықтау, әзіл-сықақ театрларының бір-бірімен тәжірибе алмасуы арқылы өнерлерін жетілдіру, жандандыру.
Қазақ сатирасының сардарын ұлықтаған фестивальге белгілі сықақшы Көпен Әмірбек (қазылар алқасының төрағасы), театр және кино актері Асылбек Боранбай, «Екі езу» театрының директоры Нұрлыбек Жұбатқан қазылық етті.
Айта кетейік, байқау ережесіне сәйкес, келестік театр ұжымы бірінші кезеңде Сейіт Кенжеахметовтың «Шындық қалай шықты» шығармасын сахналаса, екінші кезеңде еркін тақырып бойынша Нұрлан Имановтың «Дәрігер» қойылымын ұсынды. Аталған әзіл-сықақ театрының жетекшісі – Бақыт Тұрсынов.
