Отырар ауданының Мәдениет сарайында Отырар мемлекеттік археологиялық қорық-музейінің ұйытқы болуымен «Қолөнер – халық қазынасы» атты республикалық қолөнер шеберлерінің жәрмеңкесі жоғары деңгейде ұйымдастырылып, мазмұнды өтті. Көп ғасырлық сырлы шежіресі бар, дана халқымыздың әдет-ғұрып, салт-дәстүрінен сыр шертіп, ұрпақтан ұрпаққа жалғасып келе жатқан хас өнерді кәсіп етіп, шеберліктің шыңына жеткен шеберлердің қолынан шыққан қайталанбас туындылары музейлердің құнды жәдігерлерінің қатарын толықтырып, есімдері тарих беттеріне жазылуда.

Республикамыздың бірнеше аймақтарындағы ұлттық қолөнерді жалғастырушы шеберлердің басын қосқан маңызды жиынды ҚР Мәдениет және спорт министрлігі мәдениет комитетінің төрайымының орынбасары Күміс Сеитова мен аудан әкімінің орынбасары Айдос Құлмаханов жылы лебізді ақ тілектерін білдірісіп, айтулы шараға қатысушы шеберлерге шығармашылық табыс тіледі.

Талантты шеберлердің ең озық туындылары көпшілік көрермендердің назарына ұсынылған өнер кешінде ҚР Суретшілер Одағының мүшесі, Орта Азия және Тынық мұхиты өңірлік қолөнершілер кеңесінің вице-президенті Айжан Бекқұлова, Шығыс Қазақстан қолөнершілерді қолдау ресурстық орталығының жетекшісі Райса Мұхамеджанова және жерлесіміз, ҚР «Мәдениет саласының үздігі», белгілі суретші Әділхан Мәліктер әділқазылық етіп, туындыларға өз бағаларын берді. Алты сағатқа созылған жәрмеңкеге өз туындыларын ұсынған шеберлерге кәделі марапаттар тапсырылды.