Бүгін Ордабасы ауданындағы Шұбарсу елді мекенінде “Ордабасы ART” спорт кешені ашылды.
Жаңадан ашылған спорт кешенінде қазақ күресі, еркін күрес, бокс, таэквондо, каратэ-до, грек-рим күресі, жекпе-жек, үстел теннисі, шахмат үйірмелері жұмыс істейді.
Сондай-ақ, 15 жаттықтырушы 1000-ға тарта балаға 50 топпен қызмет көрсетеді. Нысанның ашылу салтанатына аудан әкімі Нұрбек Бадырақов қатысып, өз құттықтауын жеткізді.
«Мемлекет басшысы Қасым-Жомарт Тоқаев өзінің Жолдауында ұлт денсаулығын бекемдеу мәселесіне ерекше тоқталып, барлық жас санаттары арасында бұқаралық спорт түрлерін дамыту керектігін айтқан болатын. Соған сәйкес ауданымызда жастар мен балалар үшін спорттық инфрақұрылымның барынша қолжетімді болуы қамтамасыз етіліп келеді. Мақсат – бұқаралық спортты дамыту және дені сау әрі саналы ұрпақты, мықты ұлтты қалыптастыру. Ауданымыздағы спорт саласының дамуына жеке кәсіпкерлердің де үлесі зор. Көптеген кәсіп иелері түрлі спорт нысандарын салуда. Соның бірі – осы спорт кешені», – деді аудан әкімі.
Айта кетсек, ауданнан ҚР еңбегі сіңген 11 жаттықтырушы, 3 спорт қайраткері, 22 – Әлем жеңімпазы, 19 – Азия жеңімпазы, 25 – Әлем және Азия чемпионаттарының жүлдегері, 58 – Халықаралық дәрежедегі спорт шебері, 130-тен аса спорт шебері шыққан. Бүгінде ауданда барлығы 240 спорт нысаны жұмыс істейді.
