Халқымыздың рухын көтеріп, қасиетті аспабын насихаттау мақсатында шілде айының алғашқы аптасында «Ұлттық Домбыра күні» аталып өтіп келеді.

Осыған байланысты Отырар ауданы орталығындағы Шәмші Қалдаяқов аллеясында ұлттық домбыра күніне арналған «Домбыра думан» атты мерекелік шара жоғары деңгейде аталып өтті. Шараның мақсаты – жастардың шығармашылық қабілетін арттыра отырып, жеке тұлғаның рухани адамгершілігін дамыту, мәдени сауатты, қазақтың аспаптық музыкасын терең түсінетін, құрметтейтін, өресі биік, халқымыздың ұлттық аспабы домбыраны қастерлейтін ұрпақ тәрбиелеу, өнерге бейімдеу арқылы әсемдік әлемін таныту, өнерге деген сүйіспеншілігін, ынта – ықыласын арттыру болып табылады.

Қасиетті өңіріміздегі жыраулық дәстүрді насихаттау, күмбірлеген күй төгілген қазақ халқының музыкалық аспабы домбыраның құдіретін келешек ұрпақ санасында жаңғыртуға бағытталған мерекелік кешке арнайы қатысқан аудан әкімінің орынбасары Айдос Құлмаханов күйшілік дәстүрдің алтын жібін жалғаған өнер саласы майталмандары мен жастарға шығармашылық табыс тілеп, ыстық ықыласын жеткізді.

Ол өз сөзінде: «Сіздерді Ұлттық домбыра күнімен шын жүректен құттықтаймын! Халқымыздың бай мұрасын, басты құндылықтарын ғасырдан-ғасырға күмбірлеген үнімен жеткізген домбыра қазақтың даласын сазға бөлеп келеді. Қазаққа қиындықта сүйеу, қуанышта көңіл қанаты болған қара домбыраның қоңыр үні – қанымызда, бебеулеген сарыны – санамызда сақталған, ұлттық кодымызда таңбаланған. Сондықтан атадан балаға аманат болған асыл мұрамызды сақтап, қадір тұтуымыз қажет»,-деді.

Мерекелік кештің шымылдығы аудандық Өнер және саз мектебінің ұстаздары мен шәкірттерінен құралған домбырашылардың орындауындағы әйгілі күйші Құрманғазының «Адай», М.Әубәкіровтің «Талас» күйлерімен түріліп, одан әрі ауданның өнерлі жастарынан құралған «Отырар» триосының өнерлерімен жалғасын тапты. Өнер кешінде аудандық мәдениет сарайының өнерпаздары Ж.Төлебаев, Н.Құраловтар халық әндерін нақышына келтіре орындаса, А.Нұртаза мен М.Адасханова жетіген мен домбыраның үнін үйлестіре отырып, әсем әндерімен көпті тәнті етті. Мерекелік жиында белгілі сазгер, жерлесіміз Шәмші Қалдаяқовтың әндері насихатталып, «Шалқыған Шәуілдір» әнін жастар қосыла шырқады.

Қазақтың қара домбырасы – бұл халықтың қазынасы. Жоғары деңгейде ұйымдастырылған шараға келген көпшілік естелікке суретке түсіп, көтеріңкі көңіл күймен тарқасты.