«24 маусым Судья және сот қызметкерлері күні», «23 маусым-Қазақстан Республикасының Мемлекеттік қызметшілері» күні мен «Қазақстан полициясына 30 жыл» мерекелеріне орай үстел теннисі, бильярд және шағын футболдан аудандық спартакиада өз мәресіне жетіп, жеңімпаздар мен жүлдегерлер анықталды.
Бүгінгі спартакиадада ауданның мемлекттік қызметкерлері және құқық қорғау органдарының өкілдері бақ сынасып, тартысты дода кезең бойынша өтті.
Жайкүйерлерге көтеріңкі көңіл-күй сыйлап, әсерлі ойын көрсете білген бүгінгі додаға аудан әкімі Сәкен Сұлтанханов арнайы келіп, көпшілікпен бірге тамашалады.
Шағын футболдан бақ сынаған 12 команда арасынан аудандық төтенше жағдайлар бөлімінің ұжымы 3 орын үшін болған ойында аудандық полиция бөлімінен басым түсті. Алма-кезек шабуылмен өрбіген ойында құқық қорғаушыларға сәттілік жетіспегені көзге көрінді.
Ақтық сынға аудан әкімі аппараты мен аудандық экономика және қаржы бөлімінің аяқдопшылары шығып, ойын көрігін қыздыра түсті. Ақтық айқаста жоғары деңгейде ойын көрсете білген қаржыгерлер командасының бағы мен бабы қатар шауып, бұл сайыста жеңімпаз атанды.
Жарыс қорытындысы бойынша жеңімпаздар мен жүлдегерлерді және үздік ойынымен көзге түскен футболшыларды аудандық соттың төрағасы Марат Қуандықов, аудан әкімінің орынбасары Айдос Құлмахановтар құттықтап, сый-сияпаттар тапсырды. Дінмұхамед Абайұлы үздік шабуылшы атанса, Асхат Нұрбековтің қанжығасына үздік қорғаушы номинациясы байланды.
Үстел теннисінен өткен ойында аудан әкімі аппаратының бас инспекторы Руслан Рахимов жүлделі ІІІ орыннан көрінсе, Отырар археологиялық қорық-музейінің қызметкері Нұрсейіт Әмзе ІІ орынды иеленді. Шашасына шаң жұқтырмаған Мәрен Әлімов өзгелерден оқ бойы озық шығып, жеңімпаз атанды.
