Отырар аудандық адами әлеуетті дамыту бөліміне қарасты «Отырар» жазғы сауықтыру лагері өз жұмысын бастады. Лагердің ашылу салтанатында еліміздің Мемлекеттік Әнұраны шырқалып, оқушылар сап түзеп құрмет көрсетті. Сонан соң “Жас Ұлан” ұйымының туы кіргізіліп, лагерде демалушы топтарды аталмыш ұйымға қабылдау рәсімі өтті.
Салтанатты жиынға аудан әкімінің орынбасары Айдос Құлмаханов арнайы қатысып, балаларды жазғы демалыс күндерімен құттықтады.
Ол өз сөзінде: «Балалардың жазғы демалысын ұйымдастыру қашанда маңызды мəселенің бірі болып саналады. Жазғы каникул балалардың бос уақытының айтарлықтай бөлігін алады. Сендер үшін қызықты іс-шараларды жасау және өз мүдделерінің еркін дамуы үшін қажеттіліктерін жүзеге асыратын кезең болып табылады. Бұл лагерь өздеріңнің сан түрлі таланттарыңды ашып көрсетуге мүмкіндік береді»,-деді.
Айта кету керек, биыл лагерьде ауданымыздан 900 бала демалады. Оқу мен тәрбиелеудің үздіксіз процесі сапалы білім беру болса, қазіргі кездегі білім берудегі басты мақсат – жан-жақты өзіндік ой-талғамы бар, өмір сүруге бейім, адамгершілігі жоғары бәсекеге қабілетті жеке тұлғаны тәрбиелеу.
Биылғы жылы аудандағы оқушылардың жетістіктерінің қатары көбейіп, түрлі деңгейдегі білім бәсекесіне қатысып, жақсы жетістіктерге жетті. Сөйтіп, олар ауданымыздың білім саласындағы беделінің артуына өзіндік үлестерін қосты.
Атап айтқанда, Ө.Жәнібеков атындағы №4 жалпы орта лицей-интернатының оқушысы Қалаш Нұртөре Республикалық олимпиададан жүлделі ІІ орын, «Жыр алыбы-Жамбыл» Республикалық мектеп оқушылары айтысында Ш.Қалдаяқов атындағы мектеп гимназиясының оқушылары Сәуірхан Сұлтан- І орын, Болысбек Даниал ІІІ орын, ХХІІ республикалық «Абай оқулары» байқауында Ә.Байтанаев атындағы негізгі орта мектебінің оқушысы Қалдан Серік ІІІ орын иегерлері атанса, республикалық «Мұқағали Мақатаев оқуларында» Жамбыл атындағы мектеп-лицейінің оқушысы Халықов Арон мақтау қағазымен марапатталды. Сондай-ақ Республикалық Ілияс Жансүгіров оқуларында Отырар жалпы орта мектебінің оқушысы Әубәкір Мерейлім жүлделі І орынға ие болды. Бұл оқушылар республикалық олимпиадалар мен байқаулардың жеңімпаздары.
Сонымен қатар, 9-11 сынып оқушылары арасындағы жалпы білім беретін пәндер олимпиадасының үшінші облыстық кезеңнің нәтижесі бойынша 2021-2022 оқу жылында білім ұйымдарындағы үздік ұстаздарымыз бен озық ойлы шәкірттеріміздің олимпиадалар мен ғылыми жұмыстардан алған орындар саны жылдан жылға артып, облыс, республика деңгейінде жақсы нәтижелерге қол жеткізуде.
Салтанатты жиында оқушылар «Қазақстаным Отаным» әнін қосыла шырқап, одан әрі аудан өнерпаздарының өнерін тамашалады.
