«Отырар» спорт клубының ұйымдастыруымен ауданда мемлекеттік мекемелер арасында кіші футболдан «Qyzmet cup» біріншілігі бастау алды. Сайысқа 300-ге жуық қызметшілер қатысқан.
Ұйымдастырушылардың айтуынша спорттық жарыс ауданда мемлекеттік мекемелер арасында салауатты өмір салтын насихаттау, дене шынықтыру мен спортпен шұғылдануға тарту мақсатында ұйымдастырылған.
«Ауданда мінекей кіші футболдан аудандық біріншіліктің салтанатты түрде ашылуы өтіп жатыр. Спорт – мемлекеттің мәртебесін, ұлттың намысын айқындайтын көрсеткіш. Осы орайда, халықаралық аренада Қазақстан спортының беделі жыл санап көтеріле түскенін аңғара аламыз. Соңғы жылдары ауданымызда бой көтерген зәулім спорт ғимараттары мен облыстық, республикалық жарыстарды өткізе бастағанымыз әлемдік спортқа бәсекелі бола бастағанымызды да аңғартады. Сонымен қатар, спортпен айналысқан адамның денсаулығы мықты, өзі шыдамды да болады. Біздің ата – бабаларымыз “тәні саудың – жаны сау” – деп бекер айтпаған. Салауатты өмір салтын ұстанып, түрлі аурудың алдын алуға болатынын жақсы білесіздер. Осы мақсатта да ауданда осындай бір игі бастаманы қолға алып отырмыз. Сайысқа қатысушы мемлекеттік мекеме спортшыларына сәттілік тілеймін»,- деді аудан әкімінің орынбасары А.Құлмаханов.
Айта кетсек, бұл аудандық лиганың өзге жарыстардан ерекшелігі ұзақ мерзімге созылады. Жарыс қатысушылары айналмалы түрде апта сайын жұмыс уақытынан тыс уақытта бір-бірімен кездесу ойындарын өткізбек.
