Аудан әкімі Сәкен Сұлтанханов Аққұм, Балтакөл, Көксарай, Маяқұм ауыл округтерінің тұрғындарымен кездесті.
Кездесу барысында «Samruk-Kazyna Turst» Әлеуметтік жобаларды дамыту қорының келісімшартында көзделген ауыл округтеріндегі емдеу мекемелеріне заманауи жедел жәрдем көліктерінің кілті табысталды.
«Ауылдық жерлерде тұратын тұрғындармен әр тоқсан сайын кездесіп, халықтың мұң-мұқтажы мен талап-тілектерін тыңдап, осы бағытта тиісті шаралар атқарып келеміз. Міне бүгінде тұрғындар тарапынан келіп түскен өтініштер кезең-кезеңімен іске асуда. Енді дәрігерлер ауылдық жерлерге еш кедергісіз барып жедел медициналық қызмет көрсете алатын болады. Ендеше, сіздерге жүктелген ең үлкен міндеттердің бірі – халық денсаулығын жақсарту бағытындағы жұмыстарыңызға сәттілік тілеймін», – деді аудан әкімі.
Осы уақытқа дейін тұрғындар тарапынан ескі жедел жәрдем көліктері жиі бұзылып, медициналық көмек дер кезінде көрсетілмейтіндігіне шағым түскен.
Бүгінде емхана дәргерлерімен бірге ауыл тұрғындары да ауылдық жедел жәрдем көліктерінің берілуіне дән риза. Халықтың мұң-мұқтажын тыңдап, жайлы жағдай жасап жатқан мемлекетімізге, осы бағытта қызмет етіп жүрген ел азаматтарына шынайы алғысымызды айтамыз дейді тұрғындар.
