Отырар ауданында сайлауға дауыс беруге келген тұрғындардың қарасы қалың. Саяси науқанға отбасымен бірге келіп, өз таңдауын жасаған отбасының бірі – Аянбаевтар отбасы.
Отандасқандарына 48 жыл болған көпбалалы отбасының ақжаулықты анасы Айзада Әзімтайқызы бүгінде 26 немере, 2 шөбере сүйіп отырған Батыр ана. Өсірген ұл-қыздары мен немерелерінің болашағына алаңдаған отбасы №494 Шеңгелді сайлау учаскесіне келіп, өз таңдауын жасады.
«Бүгін, міне, балаларым мен немерелерімнің болашағы үшін өзіміз таңдаған үміткерге дауыс беруге келдік. Жолдасым екеуміз бұл саяси науқанға әрбір қазақстандық қатысып, Президентіміз айтқан Әділетті Қазақстан идеясы жүзеге аса берсін дейміз. Барша жерлестерімізді өз таңдауын жасауға шақырамыз», – дейді Айзада Әзімтайқызы.
Аудандағы барлық сайлау учаскелері интернет, байланыс телефоны, бақылау камераларымен, қосымша электр көздерімен және арнайы басқа да құрал жабдықтармен толық қамтылған. Айта кетейік, сайлау учаскелері таңғы сағат 7.00-ден кешкі сағат 20.00-ге дейін жұмыс істейді.
