Бүгін «AMANAT» партиясының Түркістан облыстық филиалы қоғамдық қабылдау бөлмесінде, кезекті қоғамдық қабылдау ұйымдастырылды.
Азаматтарды ҚР Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызмет) Түркістан облысы бойынша департаменті басшысының бірінші орынбасары Арынбаев Нұрлан Керімханұлы мен «AMANAT» партиясы Түркістан облыстық филиалы қоғамдық қабылдау бөлмесінің меңгерушісі Құлжанов Берік Үшкемпірұлы қабылдады.
Азаматтардың арыз-өтініштері бойынша онлайн-офлайн форматта өткен қоғамдық қабылдауға 7 тұрғын мәселесін арқалап келді.
Өңірдің әр ауданынан келген тұрғындар көптен бері шешімін таппаған құжаттандыру мәселесі, алаяқтық, қасақана жасалған қылмыстық әрекеттер бойынша наразылықтарын білдірді. Полиция қызметкерлерінің атынан ұрып – соғу, қорлық көрсету, тіпті адам жоғалу фактілері бойынша да шағым айтқандардар болды. Атап айтқанда, қабылдауға Кентау қаласынан келген Ирода Затирова есімді тұрғынның үйіне 2022 жылдың желтоқсан айында ұры түскен. Құқық қорғау қызметкерлеріне шағымданған. Алайда қазіргі таңда ұрлық жасаған күдікті анықталса да қылмыстық іс бойынша тергеп-тексеру жұмыстары тиісінше атқарылмай отырғанын айтып, сот ісі созылып кеткендігі бойынша шағымын айтты. Сонымен қатар, Нұрлан Арынбаевқа созбалаңға салынған сот ісі мен заң бұзушылықтарды қалпына келтіріп, аталған проблемаларға көмек көрсетуді сұрады. Азаматтарды қабылдаған басқарма басшысының бірінші орынбасары Нұрлан Керімханұлы оларға барлық мәселе заң аясында шешілетінін айтып, ұсыныстары мен талап-тілектерін жазып алды. Сонымен қатар, Нұрлан Арынбаев мәселенің маңыздылығына қарай ҚР Сыбайлас жемқорлыққа қарсы іс-қимыл агенттігінің Түркістан облысы бойынша департаментіне келіп арыз жазу керектігін айтып, жеке қабылдауына шақырды.
