ТҮРКІСТАН: ПАВЛОДАР ОБЛЫСЫНДА 2 МЫҢҒА ЖУЫҚ БОС ЖҰМЫС ОРНЫ БАР

526

Бұл туралы Түркістан облысына арнайы келген ақпараттық-насихаттық топ өкілі Ерсін Жұмашев брифингте мәлімдеді.

Павлодар облысында қазіргі уақытта дәрігер, мұғалім және техникалық сала мамандары тапшы. Халық саны аз аймаққа Мемлекеттік бағдарлама аясында қоныс аударуға ниетті жандарға қолдау да ерекше. Мәселен, былтыр Түркістан облысынан Павлодарға көшкен 90-ға жуық отбасының мүшелері жұмысқа орналастырылып, баспанамен қамтылған.

«Солтүстікке көшкен жанұядағы әрбір адамға бірретік 214 мың теңге қаржы беріледі. Ауыл шаруашылығын дамытамын деген шаруалар үшін де жер құнарлылығын атап өткім келеді. Мемлекет қорындағы баспанада 5 жыл көлемінде тұрған азаматтарға үй аттарына рәсімделіп беріледі. Өкінішке орай, денсаулығына байланысты ауа райы жақпай немесе отбасылық жағдайлармен туған жеріне қайта оралған азаматтар бар. Бұл біздің тарапымыздан жағдай жасалмағандығы емес, азаматтардың ерікті түрде белгілі себептермен қайту фактісі», – деді Павлодар қаласының жұмыспен қамту орталығының бөлім басшысы Ерсін Ағынтайұлы.

Айта кетейік, Павлодардан Түркістан облысына келген ақпараттық топ мүшелері 1 апта бойы облыс аумағындағы 17 қала-аудан тұрғындарымен жүздеседі.